દ્વારકા: અરબી સમુદ્રમાં દ્વારકા કાંઠે આજે દરિયાઈ પરિસ્થિતિમાં નોંધપાત્ર બદલાવ જોવા મળ્યો છે. સમુદ્રમાં કરંટ જોવા મળ્યો હોવાના કારણે સામાન્ય કરતાં પવનની ગતિમાં પણ વધારો નોંધાયો છે.

સ્થાનિક માહિતી મુજબ દરિયાકાંઠે અંદાજે 8 થી 10 ફૂટ જેટલા ઊંચા મોજા ઉછળતા જોવા મળ્યા હતા, જેના કારણે કાંઠા વિસ્તારમાં ચિંતા સાથેનું વાતાવરણ સર્જાયું છે.

ગરમીથી રાહત મેળવવા માટે અનેક સહેલાણીઓ દરિયાકાંઠે પહોંચ્યા હતા, પરંતુ અચાનક વધેલા મોજા અને પવનના કારણે લોકોમાં થોડો ભયનો માહોલ પણ જોવા મળ્યો હતો.

હવામાન વિભાગની આગાહીને લઈને સમુદ્રમાં આ પ્રકારનો કરંટ સર્જાયો હોવાનું માનવામાં આવી રહ્યું છે. આગામી 2 થી 3 દિવસ સુધી વિસ્તારમાં વરસાદી માહોલ રહેવાની શક્યતા પણ વ્યક્ત કરવામાં આવી છે.

સ્થાનિક તંત્ર દ્વારા દરિયાકાંઠે સાવચેતી રાખવાની સૂચના આપવામાં આવી છે અને લોકોને ઊંચા મોજાવાળા વિસ્તારોમાં ન જવાની અપીલ કરવામાં આવી છે.