દાહોદ દાહોદ શહેરમાં રાત્રિ ધીમે ધીમે ઘેરાઈ રહી હતી. ઈન્દોર–અમદાવાદ નેશનલ હાઈવે પર વાહનોની અવરજવર ઓછી થઈ ગઈ હતી અને શહેરના મોટા ભાગના વિસ્તારો શાંત થઈ ગયા હતા. પરંતુ શહેરની બહાર એક ખુલ્લી જગ્યામાં સાત શંકાસ્પદ લોકો શાંતિથી બેઠા હતા. તેમની નજર રસ્તા પર સ્થિર હતી અને મનમાં મોટી ધાડની યોજના ચાલી રહી હતી. આ લોકો મધ્યપ્રદેશથી સક્રિય થયેલી કુખ્યાત આંતરરાજ્ય પારધી ગેંગના સભ્યો હતા, જે ગુજરાત સહિત અનેક રાજ્યોમાં લૂંટ અને ઘરફોડ ચોરી જેવા ગંભીર ગુનાઓમાં સંડોવાયેલા છે.

દાહોદના મહિન્દ્રા શોરૂમ સામે, આરટીઓ ઓફિસ નજીક અંધારામાં આ આરોપીઓએ પોતાની સંપૂર્ણ યોજના તૈયાર કરી લીધી હતી. કઈ જગ્યાએ ધાડ પાડવી, કયા રસ્તેથી ભાગવું અને જો કોઈ સામનો કરે તો કેવી રીતે બચવું—બધું નક્કી થઈ ચૂક્યું હતું. પરંતુ તેમને ખબર નહોતી કે પોલીસ તેમની દરેક હરકત પર નજર રાખી રહી છે. એલસીબી પોલીસ ઇન્સ્પેક્ટર ડી.એમ. ઢોલને મળેલી ગુપ્ત બાતમી બાદ પોલીસ તાત્કાલિક એક્શનમાં આવી ગઈ હતી અને સમગ્ર વિસ્તારમાં ચુસ્ત નાકાબંધી ગોઠવી દેવામાં આવી હતી.

રાતના અંધકારમાં પોલીસ ટીમોએ આખો વિસ્તાર ઘેરી લીધો હતો. ટોર્ચના ધીમા અજવાળામાં પોલીસ આગળ વધી અને ગેંગ સુધી પહોંચી ગઈ. યોગ્ય સંકેત મળતા જ પોલીસે અચાનક કાર્યવાહી કરી આરોપીઓને ઘેરી લીધા. અચાનક થયેલા આ ઓપરેશનથી આરોપીઓમાં ગભરાટ ફેલાઈ ગયો અને ભાગવાનો પ્રયાસ કર્યો, પરંતુ પોલીસનો ઘેરાવો એટલો મજબૂત હતો કે સાતેય આરોપીઓ સ્થળ પરથી જ ઝડપાઈ ગયા.

પકડાયેલા આરોપીઓની તલાશી દરમિયાન પોલીસ પણ ચોંકી ઉઠી હતી. તેમની પાસેથી હાઇડ્રોલિક કટર, તાર કાપવાના સાધનો, લોખંડનો ઘણ, દસ્તા, છરા અને ગીલોલ જેવા મારક સાધનો મળી આવ્યા હતા, જેનો ઉપયોગ મોટી ધાડ માટે થવાનો હતો.

પૂછપરછ દરમિયાન આરોપીઓએ સ્વીકાર્યું કે તેઓ આ સાધનોનો ઉપયોગ ઘર અને દુકાનોના તાળા તોડવા માટે કરતા હતા. જો કોઈ વિરોધ કરે તો છરા અને ગીલોલ વડે હુમલો કરવામાં આવતો હતો. કુતરાઓને ભગાડવા અને લોકોને દૂર રાખવા માટે પણ ગીલોલનો ઉપયોગ થતો હતો. પોલીસ તપાસમાં વધુ ખુલાસો થયો કે આ ગેંગ સામે ગુજરાત, મધ્યપ્રદેશ, રાજસ્થાન અને ઉત્તરપ્રદેશમાં 20થી વધુ ગુનાઓ નોંધાયેલા છે અને ઘણા આરોપીઓ લાંબા સમયથી ફરાર હતા.

આ ગેંગની કાર્યપદ્ધતિ પણ ફિલ્મી સ્ટાઇલ જેવી હતી—પહેલા શહેરમાં દિવસો સુધી રેકી કરવી, પછી સુમસામ વિસ્તાર પસંદ કરવો અને મધરાતે હથિયારો સાથે ધાડ પાડવી. પરંતુ આ વખતે દાહોદ પોલીસની સતર્કતાએ આખો પ્લાન નિષ્ફળ બનાવી દીધો. જિલ્લા પોલીસે સમયસર કાર્યવાહી કરી માત્ર આરોપીઓને જ ઝડપી પાડ્યા નહીં પરંતુ એક મોટી ધાડ અને ગંભીર ગુનાને બનતા પહેલાં જ અટકાવી દીધો. રાતના અંધકારમાં ઘડાયેલી આ ખતરનાક સાજિશ આખરે પોલીસના તેજસ્વી એક્શન સામે સંપૂર્ણ રીતે ફેલ સાબિત થઈ ગઈ.