દાદાર નગર હવેલી દાદરા નગર હવેલીના સીદોની ગ્રામ પંચાયત અંતર્ગત આવેલા થોરાતપાડા વિસ્તારમાં આજે શોર્ટ સર્કિટના કારણે એક મકાનમાં ભીષણ આગ ફાટી નીકળી હતી. મળતી માહિતી મુજબ પ્રકાશભાઈ થોરાતના ઘરે અચાનક આગ લાગતાં વિસ્તારમાં અફરાતફરીનો માહોલ સર્જાયો હતો.

આગ એટલી ઝડપથી પ્રસરી ગઈ હતી કે પરિવારને ઘરનો સામાન બહાર કાઢવાનો કે બચાવવાનો સમય પણ મળ્યો નહોતો. જોતા જોતા આખું મકાન આગની ઝપેટમાં આવી ગયું હતું.

આ દુર્ઘટનામાં ઘર તેમજ ઘરવખરીનો તમામ સામાન બળીને ખાખ થઈ ગયો છે. જોકે, સદનસીબે ઘટનામાં કોઈ જાનહાનિ થઈ નથી. પરંતુ ગરીબ પરિવારનું આશિયાનું સંપૂર્ણપણે નષ્ટ થતાં તેમના પર આર્થિક સંકટ તૂટી પડ્યું છે.

ઘટનાની જાણ થતાં સ્થાનિક લોકો મોટી સંખ્યામાં સ્થળ પર દોડી આવ્યા હતા અને શક્ય મદદ કરવાનો પ્રયાસ કર્યો હતો. હાલ સ્થાનિક લોકો અને સામાજિક આગેવાનો દ્વારા અસરગ્રસ્ત પરિવારને આર્થિક તથા જરૂરી સહાય પહોંચાડવા અપીલ કરવામાં આવી રહી છે.