વોશિંગ્ટન: આંતરરાષ્ટ્રીય યોગ દિવસ નિમિત્તે સમગ્ર અમેરિકામાં વિવિધ શહેરોમાં ભવ્ય કાર્યક્રમોનું આયોજન કરવામાં આવ્યું હતું. ટેક્સાસના પાર્કોથી લઈને ન્યૂયોર્કના ટાઈમ્સ સ્ક્વેર અને વોશિંગ્ટન ડીસીના ઐતિહાસિક સ્થળો સુધી યોગનો ઉત્સાહ જોવા મળ્યો હતો. આ વર્ષે "સ્વસ્થ વૃદ્ધાવસ્થા માટે યોગ" થીમ હેઠળ આયોજિત કાર્યક્રમોમાં શારીરિક અને માનસિક આરોગ્ય પર વિશેષ ભાર મૂકવામાં આવ્યો હતો.

સંયુક્ત રાષ્ટ્ર દ્વારા 21 જૂનને આંતરરાષ્ટ્રીય યોગ દિવસ તરીકે માન્યતા મળ્યા બાદ અમેરિકામાં યોગની લોકપ્રિયતા સતત વધી રહી છે. આજે લાખો અમેરિકનો નિયમિત યોગાભ્યાસ કરે છે અને યોગ અમેરિકામાં ભારતીય સંસ્કૃતિની સૌથી પ્રભાવશાળી ઓળખ બની ગયો છે.

ટેક્સાસના શુગર લેન્ડ ખાતે યોજાયેલા મુખ્ય કાર્યક્રમમાં મોટી સંખ્યામાં લોકો, ચૂંટાયેલા પ્રતિનિધિઓ અને યોગપ્રેમીઓ જોડાયા હતા. આ ઉપરાંત ન્યૂયોર્કના સેન્ટ્રલ પાર્ક અને પ્રખ્યાત ટાઈમ્સ સ્ક્વેરમાં પણ વિશાળ યોગ સત્રો યોજાયા હતા. દર વર્ષે યોજાતા ‘સોલ્સ્ટિસ ઇન ટાઈમ્સ સ્ક્વેર’ કાર્યક્રમમાં હજારો લોકો જોડાતા હોય છે અને આ વર્ષે પણ મોટી સંખ્યામાં લોકોની હાજરી નોંધાઈ હતી.

વોશિંગ્ટન ડીસીમાં ભારતીય દૂતાવાસના નેતૃત્વ હેઠળ લિંકન મેમોરિયલ ખાતે વિશેષ યોગ કાર્યક્રમ યોજાયો હતો. તેમાં રાજદૂતો, કાયદા નિર્માતાઓ, સમુદાયના આગેવાનો અને ભારતીય-અમેરિકન સમાજના સભ્યોએ ભાગ લીધો હતો.

યોગ દિવસને અમેરિકાના અનેક રાજ્યોમાં સત્તાવાર માન્યતા પણ મળી રહી છે. ન્યૂયોર્ક સ્ટેટ સેનેટે યોગ દિવસને સમર્થન આપતો પ્રસ્તાવ સર્વાનુમતે પસાર કર્યો હતો. જ્યારે ડેલાવેરના ગવર્નરે 21 જૂનને સત્તાવાર રીતે ‘આંતરરાષ્ટ્રીય યોગ દિવસ’ તરીકે જાહેર કરતો ઘોષણાપત્ર બહાર પાડ્યો હતો.

સેન ફ્રાન્સિસ્કોના ગોલ્ડન ગેટ બ્રિજ નજીક, લોસ એન્જેલસ, સિયાટલ, શિકાગો, એટલાન્ટા, મિયામી, ડેનવર અને બોસ્ટન સહિત અનેક શહેરોમાં પણ યોગ કાર્યક્રમો યોજાયા હતા. અનેક યુનિવર્સિટી કેમ્પસ અને સમુદાય કેન્દ્રોમાં લોકો એકત્ર થઈ યોગાભ્યાસ કર્યો હતો.

નિષ્ણાતોના મતે અમેરિકામાં યોગ દિવસની વધતી ઉજવણી દર્શાવે છે કે યોગ હવે માત્ર એક દિવસનો કાર્યક્રમ નહીં પરંતુ આરોગ્ય અને સુખાકારી સાથે જોડાયેલો લોકચળવળ બની ગયો છે. ભારતમાંથી શરૂ થયેલી આ પરંપરા આજે વિશ્વભરમાં કરોડો લોકોને સ્વસ્થ જીવનશૈલી તરફ પ્રેરિત કરી રહી છે.