વોશિંગ્ટન: અમેરિકાના કેટલાક સાંસદોએ ટ્રમ્પ પ્રશાસનને આંતરરાષ્ટ્રીય વિદ્યાર્થીઓ માટેની હાલની વિઝા વ્યવસ્થા યથાવત રાખવાની અપીલ કરી છે. સાંસદોએ ચેતવણી આપી કે સ્ટુડન્ટ વિઝા પર કડક મર્યાદા મૂકવાથી અમેરિકાની ટેક્નોલોજી, સંશોધન અને અર્થતંત્રને નુકસાન થઈ શકે છે.

સાંસદોના જણાવ્યા મુજબ, વિદેશી વિદ્યાર્થીઓ અમેરિકાના STEM ક્ષેત્ર અને અર્થતંત્ર માટે મહત્વપૂર્ણ યોગદાન આપે છે. ચાર વર્ષની નિશ્ચિત વિઝા મર્યાદા લાદવામાં આવશે તો વિદ્યાર્થીઓને વારંવાર વિઝા એક્સટેન્શન લેવું પડશે અને અનેક સંશોધકો અમેરિકા આવવાનું ટાળી શકે છે.

સાંસદોએ કહ્યું કે આંતરરાષ્ટ્રીય વિદ્યાર્થીઓ દર વર્ષે અમેરિકી અર્થતંત્રમાં અબજો ડોલરનું યોગદાન આપે છે અને લાખો નોકરીઓને ટેકો આપે છે.

પત્રમાં જણાવાયું હતું કે, “જો અમેરિકામાં વિદેશી STEM ગ્રેજ્યુએટ્સની સંખ્યામાં એક-તૃતીયાંશ ઘટાડો થશે, તો દેશ પોતાના ઉચ્ચ કૌશલ્ય ધરાવતા STEM વર્કફોર્સના 6 થી 11 ટકા સુધીનો હિસ્સો ગુમાવી શકે છે.” વધુમાં ઉમેરાયું હતું કે આવી પરિસ્થિતિથી આગામી દાયકામાં અમેરિકાની GDPમાં દર વર્ષે 240 અબજથી 481 અબજ ડોલર સુધીનો ઘટાડો થઈ શકે છે.