દાહોદ જિલ્લામાં બુટલેગરો સામે પોલીસ દ્વારા કડક અને સઘન કાર્યવાહી હાથ ધરવામાં આવી રહી છે. જિલ્લામાં ગેરકાયદેસર દારૂના વેપાર પર રોક લગાવવા માટે પોલીસ સતત પેટ્રોલિંગ અને ચેકિંગ કરી રહી છે.

આ દરમિયાન લીમડી પોલીસ મથકની ટીમે મોટી સફળતા મેળવી છે. બાજરવાડા ડુંગરી રોડ વિસ્તારમાંથી પસાર થતા એક ટ્રેક્ટરને અટકાવી તપાસ કરતાં તેમાં છુપાવીને લઈ જવાતો વિદેશી દારૂનો મોટો જથ્થો મળી આવ્યો હતો. પોલીસ દ્વારા ટ્રેક્ટરની તલાશી દરમિયાન બિયર નંગ 192 તથા વિસ્કી નંગ 384 મળી કુલ વિદેશી દારૂનો જથ્થો કબજે કરવામાં આવ્યો હતો.

જપ્ત કરાયેલા દારૂની કુલ કિંમત ₹45,888 જેટલી આંકવામાં આવી છે, જ્યારે ટ્રેક્ટર અને મોબાઇલ ફોન સહિત કુલ ₹4,55,888 નો મુદ્દામાલ પણ પોલીસે કબજે કર્યો છે.

આ કેસમાં મુખ્ય આરોપી રાહુલભાઈ તાવીયાડની ધરપકડ કરવામાં આવી છે. પોલીસ દ્વારા આગળની તપાસ હાથ ધરવામાં આવી છે તેમજ આ ગેરકાયદેસર પ્રવૃત્તિમાં સંડોવાયેલા અન્ય લોકોની પણ તપાસ ચાલી રહી છે.