વડોદરા વડોદરાના કુખ્યાત બુટલેગર લાલચંદ ઉર્ફે લાલુ સિંધીને પોલીસએ માલપુર નજીકથી ઝડપી પાડતા બૂટલેગિંગ જગતમાં ખળભળાટ મચી ગયો છે. લાલુ સિંધી લાંબા સમયથી પોલીસને ચકમો આપી ફરાર હતો અને તેની સામે ગુજસીટોક સહિત વિદેશી દારૂના ગંભીર ગુનાઓ નોંધાયેલા હતા. નંદેસરી પોલીસ સ્ટેશનમાં તેના વિરુદ્ધ ગુજસીટોક હેઠળ ગુનો નોંધાયો હતો, જ્યારે જવાહરનગર પોલીસ સ્ટેશનમાં પણ દારૂ સંબંધિત ગુનામાં તે વોન્ટેડ હતો.

પોલીસને મળેલી ચોક્કસ બાતમીના આધારે વોચ ગોઠવવામાં આવી હતી. દરમિયાન લાલુ સિંધી કારમાં શહેરાથી મોડાસા તરફ જઈ રહ્યો હતો ત્યારે માલપુર નજીક રોડ પરથી તેને ઝડપી લેવામાં આવ્યો હતો. આરોપી વડોદરાના વારસીયા વિસ્તારમાં આવેલી રોયલ હાઈટ્સમાં રહેતો હોવાનું સામે આવ્યું છે. તેની ધરપકડ બાદ પોલીસ હવે તેના નેટવર્ક, દારૂના સપ્લાય અને અન્ય સાગરિતોને લઈને વધુ તપાસ હાથ ધરી રહી છે.