અમદાવાદ: રાજ્યમાં દારૂબંધી વચ્ચે અમદાવાદના સરખેજ પોલીસે મોટી કાર્યવાહી કરતાં કરોડો રૂપિયાના વિદેશી દારૂનો જથ્થો ઝડપી પાડ્યો છે. પોલીસએ એસપી રીંગ રોડ પાસે ટ્રકમાં છુપાવીને લાવવામાં આવેલ દારૂનો જથ્થો ઝડપી પાડતા દારૂની હેરાફેરીનો મોટો પર્દાફાશ થયો છે.

પ્રાથમિક તપાસમાં સામે આવ્યું છે કે પંજાબથી દારૂનો જથ્થો અમદાવાદ લાવવામાં આવી રહ્યો હતો. આરોપીઓએ પોલીસની આંખમાં ધૂળ નાંખવા માટે ટ્રકમાં પતંજલીના કાર્ટૂન બોક્સ તેમજ લોટના કટ્ટાની આડમાં દારૂ છુપાવ્યો હતો. જોકે સરખેજ પોલીસની સતર્કતાના કારણે આખું કૌભાંડ બહાર આવ્યું હતું.

પોલીસે ટ્રકમાંથી કુલ 5088 દારૂની બોટલ અને 4536 બીયર ટીન મળી કુલ 9624 નંગનો જથ્થો જપ્ત કર્યો છે. જપ્ત કરાયેલા દારૂની કિંમત અંદાજે 76.56 લાખ રૂપિયા હોવાનું સામે આવ્યું છે. ટ્રક સહિત કુલ 1.1 કરોડ રૂપિયાનો મુદ્દામાલ કબ્જે લેવામાં આવ્યો છે.

આ કેસમાં પોલીસે આરોપી વગતારામ બેનીવાલની ધરપકડ કરી છે. હાલ સરખેજ પોલીસ દ્વારા દારૂ ક્યાં પહોંચાડવાનો હતો અને આ રેકેટમાં અન્ય કોણ-કોણ સામેલ છે તે દિશામાં વધુ તપાસ હાથ ધરવામાં આવી છે.