ગાધીનગર: ગાંધીનગરમાં મુખ્યમંત્રી  ભૂપેન્દ્રભાઈ પટેલની પ્રેરક ઉપસ્થિતિમાં ગુજરાત સરકાર અને મેટા પ્લેટફોર્મ્સ કંપની વચ્ચે મહત્વપૂર્ણ MoU પર હસ્તાક્ષર કરવામાં આવ્યા છે. વડાપ્રધાન શ્રી નરેન્દ્રભાઈ મોદીના “નાગરિક દેવો ભવ:”ના વિઝનને સાકાર કરતી દિશામાં આ પહેલને મહત્વપૂર્ણ પગલું માનવામાં આવી રહ્યું છે.

આ MoU અંતર્ગત રાજ્યમાં ડિજિટલ ગવર્નન્સને વધુ મજબૂત બનાવવામાં આવશે અને નાગરિકોને વોટ્સએપ દ્વારા જ વિવિધ સરકારી સેવાઓ ઉપલબ્ધ કરાવવામાં આવશે. આ વ્યવસ્થા દ્વારા ગ્રામ્ય અને શહેરી બંને વિસ્તારના લોકોને એક જ વોટ્સએપ નંબર મારફતે આવક, જાતિ અને EWS પ્રમાણપત્રો, રેશન કાર્ડ અપડેટ, મહેસૂલ રેકોર્ડ્સ, સોગંદનામા સહિત કુલ 20 જેટલી સેવાઓ ગુજરાતી અને અંગ્રેજી ભાષામાં ઘરે બેઠા મળી શકશે.

સરકારના જણાવ્યા મુજબ આ નવી વ્યવસ્થાથી નાગરિકોને અલગ-અલગ પોર્ટલ્સ પર જવાનું કે સરકારી કચેરીઓમાં લાંબી લાઈનમાં ઉભા રહેવાનું નિવારણ થશે. સાથે જ સેવાઓની ઝડપી ડિલિવરી અને રિયલ ટાઈમ સ્ટેટસ ટ્રેકિંગ પણ વધુ અસરકારક બનશે.

રાજ્ય સરકાર દ્વારા આવનારા સમયમાં વધુ સેવાઓને પણ આ વોટ્સએપ આધારિત પ્લેટફોર્મ સાથે જોડવાની યોજના છે, જેથી નાગરિકોને “વન-ડે ગવર્નન્સ”થી આગળ વધીને સંપૂર્ણ “ડિજિટલ અને સરળ ગવર્નન્સ”નો લાભ મળી શકે.