વડોદરા: Vadodara Gas Limitedએ છેલ્લા પાંચ મહિનામાં બીજી વખત CNG અને PNGના ભાવમાં વધારો કરીને સામાન્ય લોકોના બજેટ પર વધુ ભાર મૂક્યો છે. નવા દર મુજબ હવે વડોદરામાં CNGનો ભાવ પ્રતિ કિલો 83.95 રૂપિયા જ્યારે PNGનો દર પ્રતિ યુનિટ 51.74 રૂપિયા થયો છે.

કંપની દ્વારા જાહેર કરાયેલા સુધારેલા દર મુજબ પાઇપલાઇન મારફતે મળતા PNGના ભાવમાં પ્રતિ ક્યુબિક મીટર 1.50 રૂપિયાનો વધારો કરવામાં આવ્યો છે. જ્યારે CNGના ભાવમાં પ્રતિ કિલો 1 રૂપિયાનો વધારો કરાયો છે.

ભાવ વધારાના કારણે ઘરેલુ ગ્રાહકો ઉપરાંત ઓટોરિક્ષા ચાલકો, કેબ ઓપરેટરો અને રોજબરોજ CNG વાહનોનો ઉપયોગ કરતા લોકો પર સીધી અસર પડશે.

માહિતી મુજબ અમેરિકા, ઇઝરાયેલ અને ઇરાન વચ્ચે ચાલી રહેલા તણાવને કારણે વૈશ્વિક તેલ અને ગેસ બજારમાં અસ્થિરતા સર્જાઈ છે. આંતરરાષ્ટ્રીય બજારમાં નેચરલ ગેસ ખરીદી ખર્ચમાં વધારો અને સપ્લાયમાં અનિશ્ચિતતા વધતા ગેસ કંપનીઓ પર દબાણ વધી રહ્યું છે.

આ ઉપરાંત કોમર્શિયલ LPG સિલિન્ડરના ભાવમાં પણ વધારો નોંધાયો છે. 1 મેના રોજ 19 કિલોના કોમર્શિયલ LPG સિલિન્ડરના ભાવમાં 993 રૂપિયાનો વધારો કરવામાં આવ્યો હતો, જેના કારણે હોટલ, રેસ્ટોરન્ટ, ચાની કીટલી અને નાના વેપારીઓ પર અસર પડી છે.

તાજેતરના વર્ષોમાં Vadodara Gas Limitedએ શહેરમાં પોતાની અંડરગ્રાઉન્ડ ગેસ પાઇપલાઇન નેટવર્કનો વ્યાપ વધાર્યો છે. કંપનીના ગ્રાહકોની સંખ્યા 2.82 લાખથી વધીને 3 લાખથી વધુ થઈ ગઈ છે. જોકે, 1 મેથી નવા દર લાગુ કર્યા હોવા છતાં કંપનીએ કોઈ સત્તાવાર જાહેર જાહેરાત કરી નથી અને સુધારેલા ભાવ માત્ર વેબસાઇટ પર અપડેટ કરવામાં આવ્યા છે. ઉલ્લેખનીય છે કે જાન્યુઆરી 2026માં પણ કંપનીએ PNGના ભાવમાં 73 પૈસા પ્રતિ ક્યુબિક મીટર અને CNGના ભાવમાં 1 રૂપિયા પ્રતિ કિલોનો વધારો કર્યો હતો. નવા ભાવવધારાથી શહેરના લગભગ 3 લાખ ગ્રાહકોને સીધી અસર થવાની શક્યતા છે.