નવી દિલ્હી: કેન્દ્ર સરકારે કિંમતી ધાતુઓ પર કસ્ટમ ડ્યૂટી વધાર્યા બાદ સોનું અને ચાંદીના ભાવમાં જોરદાર તેજી જોવા મળી રહી છે. બુધવારે બંને કિંમતી ધાતુઓના ભાવમાં 6.66 ટકા સુધીનો વધારો નોંધાયો હતો.

મલ્ટી કોમોડિટી એક્સચેન્જ (MCX) પર 5 જૂન 2026ના સોનાના કોન્ટ્રાક્ટમાં સવારે 9:52 વાગ્યે 9,348 રૂપિયાનો એટલે કે 6.09 ટકાનો વધારો જોવા મળ્યો હતો અને ભાવ 1,62,790 રૂપિયા પ્રતિ 10 ગ્રામ સુધી પહોંચ્યો હતો.

તે જ રીતે ચાંદીમાં પણ ભારે તેજી જોવા મળી હતી. 5 જુલાઈ 2026ના ચાંદીના કોન્ટ્રાક્ટમાં 18,593 રૂપિયાનો એટલે કે 6.66 ટકાનો ઉછાળો નોંધાયો હતો અને ભાવ 2,97,655 રૂપિયા સુધી પહોંચ્યો હતો.

આ તેજીનું મુખ્ય કારણ કેન્દ્ર સરકાર દ્વારા કિંમતી ધાતુઓ પર આયાત શુલ્કમાં કરાયેલો વધારો છે. સરકારે સોનું અને ચાંદી પરનો આયાત શુલ્ક (ઉપકર સહિત) 6 ટકાથી વધારીને 15 ટકા કર્યો છે, જ્યારે પ્લેટિનમ પરનો આયાત શુલ્ક 6.4 ટકાથી વધારીને 15.4 ટકા કરવામાં આવ્યો છે.

સરકારનો ઉદ્દેશ વૈશ્વિક આર્થિક અનિશ્ચિતતા વચ્ચે ચાલુ ખાતાના ખાધને ઘટાડવો અને વિદેશી મુદ્રાની બચત કરવાનો છે. સરકારી સૂત્રોના જણાવ્યા મુજબ, કિંમતી ધાતુઓ પર આયાત શુલ્કમાં વધારો એ ભારતની આર્થિક મજબૂતી વધારવા, જરૂરી આયાતોને પ્રાથમિકતા આપવા અને વિદેશી મુદ્રા ભંડાર સુરક્ષિત રાખવા માટેની વ્યાપક વ્યૂહરચનાનો ભાગ છે.

સૂત્રોએ વધુમાં જણાવ્યું કે આ પગલું વૈશ્વિક પરિસ્થિતિને ધ્યાનમાં રાખીને લેવામાં આવેલ સંતુલિત અને જવાબદાર નિર્ણય છે, જે લાંબા ગાળાની આર્થિક સ્થિરતા જાળવવામાં મદદરૂપ બનશે.

આંતરરાષ્ટ્રીય બજારમાં પણ સોનું અને ચાંદીના ભાવમાં વધારો નોંધાયો છે. કોમેક્સ માર્કેટમાં સોનાના ભાવ 0.52 ટકા વધીને 4,710 ડોલર પ્રતિ ઔંસ થયા હતા, જ્યારે ચાંદી 2.28 ટકા વધીને 87.54 ડોલર પ્રતિ ઔંસ સુધી પહોંચી હતી.