વિશ્વનું સૌથી મોટું બેટરી સ્ટોરેજ સિસ્ટમ શરૂ Adani Green Energy Limited એ દુનિયાનું સૌથી મોટું સિંગલ-લોકેશન બેટરી એનર્જી સ્ટોરેજ સિસ્ટમ (BESS) શરૂ કર્યું હોવાની જાહેરાત કરી છે. કંપનીના જણાવ્યા અનુસાર, ગુજરાતના ખાવડા ખાતે કુલ 3.37 ગીગાવોટ-આવર ક્ષમતાનું બેટરી સ્ટોરેજ સિસ્ટમ કાર્યરત બન્યું છે, જે ચીન બહારનું વિશ્વનું સૌથી મોટું પ્રોજેક્ટ માનવામાં આવે છે.

ખાવડામાં વધારાઈ સ્ટોરેજ ક્ષમતા

કંપનીએ જણાવ્યું કે માર્ચ 2026 દરમિયાન 1.37 ગીગાવોટ-આવર વધારાની ક્ષમતા ઉમેરવામાં આવી હતી. તેના પરિણામે ખાવડામાં એજીઈએલની કુલ ઓપરેશનલ BESS ક્ષમતા હવે 3.37 ગીગાવોટ-આવર સુધી પહોંચી ગઈ છે.

સગર અદાણીનું નિવેદન

Sagar Adani એ જણાવ્યું કે મોટા પાયે ઊર્જા સંગ્રહ ભારતના સ્વચ્છ ઊર્જા પરિવર્તનમાં મહત્વપૂર્ણ ભૂમિકા ભજવશે. તેમણે કહ્યું કે નવીનીકરણીય ઊર્જાની ક્ષમતા ઝડપથી વધી રહી છે ત્યારે 24 કલાક વિશ્વસનીય અને સ્વચ્છ વીજ પુરવઠા માટે સ્ટોરેજ ઇન્ફ્રાસ્ટ્રક્ચર અત્યંત જરૂરી બની ગયું છે.

દસ લાખ ઘરોને મળી શકે વીજળી

કંપનીના દાવા મુજબ, 3.37 ગીગાવોટ-આવર ક્ષમતાવાળું આ સ્ટોરેજ સિસ્ટમ લગભગ 10 લાખ ઘરોને એક દિવસ માટે વીજ પુરવઠો પૂરો પાડી શકે છે. ઉપરાંત, 1.2 કરોડથી વધુ એલઈડી બલ્બોને સતત 10 કલાક સુધી વીજળી પૂરી પાડવાની ક્ષમતા પણ આ પ્રોજેક્ટમાં છે.

ગ્રીન એનર્જી માટે ગેમ ચેન્જર

કંપનીએ જણાવ્યું કે આ બેટરી સ્ટોરેજ પ્રોજેક્ટ ગ્રીન એનર્જી સેક્ટર માટે ગેમ ચેન્જર સાબિત થશે. બેટરી સ્ટોરેજના કારણે નવીનીકરણીય ઊર્જા આધારિત ગ્રીડ વધુ સ્થિર રહેશે અને 24 કલાક હરિત ઊર્જા ઉપલબ્ધ કરાવવામાં મદદ મળશે.

માત્ર 10 મહિનામાં પૂર્ણ થયું પ્રોજેક્ટ

એજીઈએલ અનુસાર, આ પ્રોજેક્ટનું નિર્માણ શરૂ થયા બાદ માત્ર 10 મહિનામાં તેને પૂર્ણ કરવામાં આવ્યો હતો. કંપનીએ તેને વિશ્વના સૌથી ઝડપી યુટિલિટી-સ્કેલ બેટરી સ્ટોરેજ પ્રોજેક્ટ્સમાંનું એક ગણાવ્યું છે.

આગામી વર્ષોમાં મોટી યોજના

કંપનીએ જાહેરાત કરી કે નાણાકીય વર્ષ 2027 સુધીમાં 10 ગીગાવોટ-આવરથી વધુ બેટરી સ્ટોરેજ ક્ષમતા ઉમેરવાની યોજના છે. આગામી પાંચ વર્ષમાં આ ક્ષમતાને વધારીને 50 ગીગાવોટ-આવર સુધી પહોંચાડવાનો લક્ષ્યાંક નક્કી કરવામાં આવ્યો છે.

આધુનિક ટેક્નોલોજીનો ઉપયોગ

આ BESS પ્રોજેક્ટમાં લિથિયમ-આયન બેટરી ટેક્નોલોજી સાથે અદ્યતન એનર્જી મેનેજમેન્ટ સિસ્ટમનો ઉપયોગ કરવામાં આવ્યો છે, જેથી કાર્યક્ષમતા, વિશ્વસનીયતા અને ગ્રીડ પ્રતિસાદ વધુ સારો બની શકે

ખાવડામાં વિકસિત થઈ રહ્યું વિશાળ એનર્જી પાર્ક

ગુજરાતના ખાવડા ખાતે Adani Green Energy Limited દ્વારા વર્ષ 2029 સુધીમાં 30 ગીગાવોટ ક્ષમતાવાળો વિશ્વનો સૌથી મોટો રિન્યૂએબલ એનર્જી પ્લાન્ટ વિકસાવવામાં આવી રહ્યો છે. હાલમાં તેમાંમાંથી 9.9 ગીગાવોટ ક્ષમતા કાર્યરત બની ચૂકી છે