Pakistan: પાકિસ્તાન સરકારે જેલમાં બંધ ભૂતપૂર્વ વડાપ્રધાન ઇમરાન ખાનના પુત્ર કાસિમ ખાન પર જીનિવામાં સંયુક્ત રાષ્ટ્ર માનવ અધિકાર પરિષદમાં (UNHRC) પોતાના ભાષણ દ્વારા દેશના જનરલાઇઝડ સ્કીમ ઓફ પ્રેફરન્સ પ્લસ (GSP પ્લસ) દરજ્જાને ઓછો કરવાનો પ્રયાસ કરવાનો આરોપ મૂક્યો છે. આ દરજ્જો પાકિસ્તાનને નિકાસ પર ટેરિફ ઘટાડવાનો અધિકાર આપે છે. ફેડરલ માહિતી પ્રધાન અત્તાઉલ્લાહ તરાર, પંજાબના માહિતી પ્રધાન આઝમા બુખારી અને સિંધના માહિતી પ્રધાન શરજીલ મેમણે કાસિમ અને પીટીઆઈ નેતા ઝુલ્ફી બુખારીની ટીકા કરતા તેને પાકિસ્તાનના GSP પ્લસ દરજ્જાને ઓછો કરવાના હેતુથી ‘સુનિયોજિત કાવતરું’ ગણાવ્યું છે.

બુધવારે UNHRCના 61મા સત્રમાં પોતાના સંબોધનમાં કાસિમ ખાને આંતરરાષ્ટ્રીય સંસ્થાને અપીલ કરી હતી કે, તેઓ પાકિસ્તાન સરકાર પર તેમના પિતાને તાત્કાલિક મુક્ત કરવા માટે દબાણ કરે. તેમણે કહ્યું કે, ‘અમે આ સંયુક્ત રાષ્ટ્ર માનવાધિકાર પરિષદને વિનંતી કરીએ છીએ કે તેઓ પાકિસ્તાનને ઇમરાન ખાન સામેની ઉત્પીડન તાત્કાલિક બંધ કરવા કહે. સરકારે UN કાર્યકારી જૂથના અભિપ્રાયનું પાલન કરવું જોઈએ અને તેમને મુક્ત કરવા જોઈએ.’ મંત્રીઓએ આરોપ લગાવ્યો કે કાસિમ અને તેના સહયોગીઓ પાકિસ્તાનના GSP પ્લસ દરજ્જાને સમાપ્ત કરવાનો હેતુ ધરાવે છે. તેમણે દાવો કર્યો હતો કે, ‘આ પાકિસ્તાન વિરોધી જૂથ યુરોપિયન યુનિયનમાં ઇઝરાયેલી લોબી અને પ્રતિબંધિત BLA સાથે સંકળાયેલા તત્વો સાથે મળીને કામ કરી રહ્યું છે.’

મંત્રીઓએ જણાવ્યું હતું કે, GSP પ્લસ દરજ્જો મળ્યા પછી પાકિસ્તાનની નિકાસમાં 40 ટકાનો વધારો થયો છે, જેનાથી કાપડ ઉદ્યોગને નોંધપાત્ર ફાયદો થયો છે અને હજારો નોકરીઓનું સર્જન થયું છે. તેમણે PTI પર રાજકીય લાભ માટે લોકોને તેમની આજીવિકાથી વંચિત રાખવાનો પ્રયાસ કરવાનો પણ આરોપ લગાવ્યો હતો. માનવાધિકાર ઉલ્લંઘનના આરોપોનો જવાબ આપતા તેમણે જણાવ્યું હતું કે, PTI સરકાર દરમિયાન મરિયમ નવાઝની તેમના પિતા નવાઝ શરીફની સામે ધરપકડ કરવામાં આવી હતી. જો કે, PTIએ સરકારના આરોપોને ફગાવી દીધા છે.

પાકિસ્તાન તહરીક-એ-ઇન્સાફ (પીટીઆઈ) ના પ્રવક્તા શેખ વકાસ અકરમે જણાવ્યું હતું કે, કાસિમ કે ઝુલ્ફી બુખારી બંનેમાંથી કોઈએ પણ પાકિસ્તાનના રાષ્ટ્રીય હિતોને નુકસાન પહોંચાડે તેવા કોઈ નિવેદનો આપ્યા નથી. તેમણે ઉમેર્યું હતું કે, કાસિમના ભાષણનું જીવંત પ્રસારણ કરવામાં આવ્યું હતું અને તેમણે GSP પ્લસ વિરુદ્ધ એક પણ શબ્દ બોલ્યો ન હતો. યુરોપિયન યુનિયન અનુસાર, જનરલાઇઝડ સ્કીમ ઓફ પ્રેફરન્સિસ પ્લસ એક ખાસ પ્રોત્સાહન યોજના છે જે વિકાસશીલ દેશોને "ટકાઉ વિકાસ અને શાસન" ને પ્રોત્સાહન આપવાના બદલામાં તેમના નિકાસ ઉત્પાદનોના બે તૃતીયાંશ ભાગ પર આયાત ડ્યુટી મુક્તિ પૂરી પાડે છે.