Iran Bahrain Drone Attack: મિડલઇસ્ટમાં ફરી એકવાર તણાવ ચરમસીમાએ પહોંચ્યો છે. અમેરિકાના હવાઈ હુમલાઓ બાદ ઈરાને બહેરીન તરફ ડ્રોન હુમલો કરીને અમેરિકી સૈન્ય ઠેકાણાઓને નિશાન બનાવ્યાનો દાવો કર્યો છે. આ ઘટનાએ સમગ્ર ખાડી વિસ્તારમાં સુરક્ષાને લઈને નવી ચિંતા ઊભી કરી છે. ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC)એ દાવો કર્યો છે કે તેણે વિસ્તારમાં સ્થિત અમેરિકી સૈન્ય ઠેકાણાઓ પર હુમલા કર્યા છે. જોકે હુમલાની ચોક્કસ જગ્યાઓ અંગે કોઈ સત્તાવાર માહિતી જાહેર કરવામાં આવી નથી.

બહેરીનનો કડક વિરોધ
બહેરીનના વિદેશ મંત્રાલયે જણાવ્યું છે કે ઈરાન તરફથી મોકલાયેલા અનેક ડ્રોન દેશને નિશાન બનાવીને છોડવામાં આવ્યા હતા. બહેરીને આ હુમલાને દેશના નાગરિકો અને રહેવાસીઓની સુરક્ષા માટે સીધો ખતરો ગણાવ્યો છે. ખાસ વાત એ છે કે બહેરીનમાં અમેરિકી નૌકાદળના પાંચમા ફ્લીટનું મુખ્ય મથક આવેલું છે. જેના કારણે આ હુમલાને માત્ર બહેરીન જ નહીં પરંતુ અમેરિકા માટે પણ સીધો પડકાર માનવામાં આવી રહ્યો છે.

હોર્મુઝ જળમાર્ગમાં જહાજ પર હુમલો
આ દરમિયાન સ્ટ્રેટ ઓફ હોર્મુઝ વિસ્તારમાં એક તેલ ટેન્કર પર પણ હુમલો થયો હોવાના અહેવાલો સામે આવ્યા છે. બ્રિટિશ મેરિટાઇમ ટ્રેડ ઓપરેશન્સ સેન્ટરે જણાવ્યું કે હુમલો થયા બાદ પણ જહાજનો ક્રૂ સુરક્ષિત છે. હાલ સુધી કોઈ સંગઠને આ હુમલાની જવાબદારી સ્વીકારી નથી, પરંતુ શંકાની સોય ઈરાન તરફ જ નિર્દેશ કરી રહી છે.

વૈશ્વિક તેલ વેપાર પર અસરની આશંકા
હોર્મુઝ જળમાર્ગ વિશ્વ માટે અત્યંત મહત્વપૂર્ણ માનવામાં આવે છે. વિશ્વના કુલ તેલ અને કુદરતી ગેસનો મોટો હિસ્સો આ માર્ગ મારફતે પસાર થાય છે. તાજેતરના હુમલાઓને કારણે વૈશ્વિક ઊર્જા બજારો અને આંતરરાષ્ટ્રીય વેપાર પર અસર થવાની શક્યતા વ્યક્ત કરવામાં આવી રહી છે. અમેરિકા અને ખાડી દેશોએ પહેલાથી જ હોર્મુઝમાં સુરક્ષા વધારી છે અને જહાજોની અવરજવર માટે વધારાના માર્ગો તૈયાર કરવાની પ્રક્રિયા શરૂ કરી છે.

મધ્યપૂર્વમાં ફરી યુદ્ધના વાદળો
તાજેતરના હુમલાઓથી ઈરાન અને અમેરિકા વચ્ચેનો તણાવ ફરી વધી ગયો છે. થોડા સમય પહેલાં બંને દેશો વચ્ચે સંઘર્ષ ઘટાડવા માટે ચર્ચાઓ ચાલી રહી હતી, પરંતુ નવા હુમલાઓ બાદ સ્થિતિ ફરી ગંભીર બની છે. સુરક્ષા નિષ્ણાતોના મતે જો આ પ્રકારની કાર્યવાહી ચાલુ રહેશે તો સમગ્ર મધ્યપૂર્વમાં મોટું સૈન્ય સંકટ સર્જાઈ શકે છે.