વડોદરા વડોદરાના તરસાલી વિસ્તારમાં આવેલી એક રહેણાંક સોસાયટીમાં કૂતરો પાલવાના મુદ્દે ભાડે રહેતા પરિવાર અને કેટલાક સ્થાનિક રહીશો વચ્ચે ઉગ્ર બોલાચાલી બાદ મારામારી થઈ હોવાનું સામે આવ્યું છે. ઘટનાનો વીડિયો સોશિયલ મીડિયા પર વાયરલ થયો છે, જેમાં એક મહિલા અને સગીર સાથે મારામારી થતી હોવાના દૃશ્યો જોવા મળી રહ્યા છે.

પ્રાથમિક માહિતી મુજબ સોસાયટીમાં કૂતરો રાખવાના મુદ્દે લાંબા સમયથી મતભેદ ચાલી રહ્યા હતા. આ મુદ્દે બંને પક્ષો વચ્ચે થયેલી તકરાર બાદ મામલો હિંસક સ્વરૂપ ધારણ કરી ગયો હતો. વીડિયો વાયરલ થતાં સમગ્ર વિસ્તારમાં ભારે ચર્ચા અને તણાવનો માહોલ સર્જાયો છે.

ઘટનાની જાણ થતાં મકરપુરા પોલીસ હરકતમાં આવી હતી અને સમગ્ર મામલે તપાસ શરૂ કરી છે. પોલીસે વાયરલ વીડિયો સહિતના પુરાવાઓના આધારે હકીકતોની ચકાસણી હાથ ધરી છે. પોલીસનું કહેવું છે કે તપાસ પૂર્ણ થયા બાદ જવાબદારો સામે કાયદેસરની કાર્યવાહી કરવામાં આવશે.

આ ઘટનાએ ફરી એકવાર રહેણાંક સોસાયટીઓમાં પાળતુ પ્રાણીઓ અંગેના વિવાદોને લઈને પ્રશ્નો ઉભા કર્યા છે. હાલ પોલીસ બંને પક્ષોના નિવેદનો લઈ સમગ્ર મામલાની તપાસ કરી રહી છે.