નવી દિલ્હી: ભારતીય બધિર (Deaf) મહિલા ક્રિકેટ ટીમ માટે ઐતિહાસિક ક્ષણ આવી પહોંચી છે. ટીમ પોતાના પ્રથમ આંતરરાષ્ટ્રીય પ્રવાસ માટે શ્રીલંકા રવાના થવા જઈ રહી છે, જ્યાં 7 જુલાઈથી 13 જુલાઈ 2026 દરમિયાન પાંચ મેચોની ટી20 આંતરરાષ્ટ્રીય શ્રેણી રમાશે. આ શ્રેણી ભારતીય બધિર મહિલા ક્રિકેટ ટીમના આંતરરાષ્ટ્રીય ક્રિકેટમાં સત્તાવાર ડેબ્યૂ તરીકે નોંધાશે. શ્રીલંકા પ્રવાસ પહેલા નવી દિલ્હીમાં ટીમની નવી જર્સીનું અનાવરણ કરવામાં આવ્યું હતું. આ કાર્યક્રમમાં ઇન્ડિયન ડેફ ક્રિકેટ એસોસિએશન (IDCA)ના અધ્યક્ષ સુમિત જૈન, IAS અધિકારી સની સિંહ, DDCAના સચિવ અશોક શર્મા તેમજ BCCI દિવ્યાંગ સમિતિના સભ્ય રવિ ચૌહાણ સહિતના મહાનુભાવો હાજર રહ્યા હતા.

IDCAના અધ્યક્ષ સુમિત જૈને જણાવ્યું કે ભારતીય બધિર મહિલા ક્રિકેટરો વર્ષોથી આંતરરાષ્ટ્રીય ઓળખ વિના મહેનત અને સમર્પણ સાથે રમત સાથે જોડાયેલા રહ્યા છે. હવે આ ખેલાડીઓ દેશનું પ્રતિનિધિત્વ કરીને વૈશ્વિક મંચ પર પોતાની પ્રતિભા દર્શાવશે. ભારતીય મહિલા ક્રિકેટ ટીમની પૂર્વ કેપ્ટન ડાયના એડુલજીએ પણ ટીમને શુભેચ્છા પાઠવતા જણાવ્યું કે ક્રિકેટ દરેક માટે છે અને આ ખેલાડીઓએ પોતાની ક્ષમતા અને રમત પ્રત્યેના સમર્પણથી અનેક અવરોધો પાર કર્યા છે. હવે વિશ્વને તેમની પ્રતિભા જોવાનો અવસર મળશે.

ટીમની કેપ્ટન કાજલ ધવને આ પ્રવાસને ઐતિહાસિક ગણાવતા કહ્યું કે આ માત્ર ક્રિકેટ રમવાની તક નથી, પરંતુ એ સાબિત કરવાની તક છે કે સાંભળવાની અક્ષમતા કોઈપણ ખેલાડીની પ્રતિભા, સપના અથવા દેશપ્રેમ માટે અવરોધ બની શકતી નથી. શ્રીલંકાના મોરાતુવામાં આવેલા ડી સોયસા પાર્ક ઇન્ટરનેશનલ ક્રિકેટ સ્ટેડિયમ ખાતે રમાનારી આ શ્રેણી ભારતીય બધિર મહિલા ક્રિકેટના વિકાસમાં મહત્વપૂર્ણ માઈલસ્ટોન સાબિત થવાની અપેક્ષા છે. આ પ્રવાસ ભવિષ્યમાં વધુ મહિલા ખેલાડીઓને પ્રેરણા આપશે અને બધિર ક્રિકેટને નવી ઓળખ અપાવશે.

ભારતીય બધિર મહિલા ક્રિકેટ ટીમ
કાજલ ધવન (કેપ્ટન અને વિકેટકીપર), નીદા જબી શેખ (ઉપકેપ્ટન), પ્રતિમા મિશ્રા, આકાંક્ષા કનાસિયા, રેડ્ડી જ્યોત્સ્ના, દીપ્તિ રાણી સાહુ, શ્રદ્ધા વૈષ્ણવ, સંગીતા, સુકન્યા કે.એસ., રૂબી યાદવ, ચાંદની ખાન, પ્રિયાંશી દીક્ષિત, ડી. કંથમ્મા, પ્રિયંકા સૈની અને અંજલિ.