મોન્ટેરી: ફિફા વર્લ્ડ કપમાં સાઉથ આફ્રિકાએ ઐતિહાસિક સિદ્ધિ હાંસલ કરી છે. ગ્રુપ-એની મહત્વપૂર્ણ મેચમાં સાઉથ આફ્રિકાએ સાઉથ કોરિયાને 1-0થી પરાજય આપીને પ્રથમ વખત ટૂર્નામેન્ટના નોકઆઉટ સ્ટેજમાં સ્થાન મેળવ્યું છે. આ જીત સાથે સાઉથ આફ્રિકાના ખેલાડીઓ અને ચાહકોમાં ભારે ઉત્સાહ જોવા મળ્યો હતો.

મેચની શરૂઆતથી જ સાઉથ આફ્રિકાએ આક્રમક રમત દાખવી હતી અને સાઉથ કોરિયાના ડિફેન્સ પર સતત દબાણ બનાવ્યું હતું. થાપેલો માસેકો, એવિડન્સ મકગોપા અને થાલેન્ટે મ્બાથાના પ્રયાસો છતાં પ્રથમ હાફમાં કોઈ ગોલ થઈ શક્યો નહોતો. સાઉથ કોરિયાના ગોલકીપર કિમ સ્યુંગ-ગ્યૂએ અનેક શાનદાર બચાવ કરીને પોતાની ટીમને મેચમાં જાળવી રાખી હતી.

બીજા હાફમાં સાઉથ કોરિયાએ વ્યૂહરચનામાં ફેરફાર કરી હુમલાખોર રમત અપનાવી હતી. કોચ હાંગ મ્યુંગ-બોએ ત્રણ ફેરફારો કર્યા અને સ્ટાર ખેલાડી સોન હ્યુંગ-મિનને પણ મેદાનમાં ઉતાર્યા, પરંતુ તેનો લાભ ટીમને મળી શક્યો નહોતો.

મેચની 63મી મિનિટે તેશપાંગ મોરેમીએ પેનલ્ટી બોક્સ નજીકથી સુંદર પાસ આપ્યો હતો, જેને થાપેલો માસેકોએ શાનદાર રીતે ગોલમાં ફેરવી દીધો હતો. માસેકોના આ ગોલે મેચનું પરિણામ નક્કી કરી દીધું હતું. 22 વર્ષ અને 225 દિવસની ઉંમરે માસેકો ફિફા વર્લ્ડ કપમાં સાઉથ આફ્રિકા માટે ગોલ કરનાર બીજા સૌથી યુવા ખેલાડી બન્યા છે.

અંતિમ મિનિટોમાં સાઉથ કોરિયાએ બરાબરી માટે અનેક પ્રયાસો કર્યા, પરંતુ સાઉથ આફ્રિકાના મજબૂત ડિફેન્સ સામે તેઓ સફળ થઈ શક્યા નહોતા. ત્રણ મેચમાં ચાર પોઈન્ટ સાથે સાઉથ આફ્રિકા ગ્રુપ-એમાં બીજા સ્થાને રહી નોકઆઉટ રાઉન્ડમાં પહોંચ્યું છે.

મેચ બાદ હીરો બનેલા થાપેલો માસેકોએ કહ્યું કે આ ક્ષણ તેમના માટે સપના જેવી છે. તેમણે જીતનો શ્રેય ચાહકોને આપતા કહ્યું કે ટીમ પર વિશ્વાસ રાખનારા અને ન રાખનારા તમામ લોકો માટે આ જીત ખાસ છે. અનેક પડકારો વચ્ચે ટીમે પોતાનું સામર્થ્ય સાબિત કર્યું છે અને હવે નોકઆઉટમાં પણ શ્રેષ્ઠ પ્રદર્શન કરવાનો આત્મવિશ્વાસ ધરાવે છે.