સાસણ ગીર (જૂનાગઢ): ગીરના પ્રખ્યાત સિંહોની જોડી **'જય-વીરુ'**ની સ્મૃતિને જીવંત રાખવાના હેતુથી સાસણ ગીરમાં વિશેષ બેકલાઇટ બોર્ડનું અનાવરણ કરવામાં આવ્યું. વન્યજીવપ્રેમી અને ઉદ્યોગપતિ પરિમલ નથવાણીના હસ્તે આ બોર્ડનું લોકાર્પણ કરવામાં આવ્યું હતું.

ગીરના જંગલમાં પોતાની અલગ ઓળખ, વીરતા અને પ્રવાસીઓમાં લોકપ્રિયતા માટે જાણીતી 'જય-વીરુ'ની જોડી આજે પણ વન્યજીવ પ્રેમીઓના મનમાં વિશેષ સ્થાન ધરાવે છે. તેમની યાદમાં તૈયાર કરાયેલા આ બેકલાઇટ બોર્ડ દ્વારા મુલાકાતીઓને તેમના જીવનપ્રસંગો અને ગીરની સમૃદ્ધ વન્યજીવ ધરોહર વિશે માહિતી મળશે.

આ બોર્ડ સાસણ ગીરની મુલાકાતે આવતા પ્રવાસીઓ માટે નવા આકર્ષણનું કેન્દ્ર બનશે, સાથે જ વન્યજીવ સંરક્ષણ અંગે જાગૃતિ ફેલાવવામાં પણ મહત્વની ભૂમિકા ભજવશે.

અનાવરણ કાર્યક્રમમાં વન વિભાગના અધિકારીઓ, સ્થાનિક આગેવાનો અને વન્યજીવપ્રેમીઓ ઉપસ્થિત રહ્યા હતા. પ્રસંગે પરિમલ નથવાણીએ જણાવ્યું હતું કે ગીરના સિંહો માત્ર ગુજરાતની નહીં, પરંતુ સમગ્ર દેશની અમૂલ્ય ધરોહર છે. આવી પહેલ દ્વારા આવનારી પેઢી પણ ગીરના ગૌરવ અને તેના સંરક્ષણ સાથે જોડાયેલી રહેશે.