Ahmedabad News: ભાજપના સાંસદ દિનેશ મકવાણાએ જણાવ્યું કે સાસા ફાઉન્ડેશન દ્વારા મણિનગર ખાતે આયોજિત 'સમૃદ્ધ ગુજરાત 2026' પ્રદર્શનમાં કેન્દ્ર અને ગુજરાત સરકારના વિવિધ વિભાગોના 50થી વધુ સ્ટોલ ઉભા કરવામાં આવ્યા છે. આ પ્રદર્શન દ્વારા સંરક્ષણ, આરોગ્ય, શિક્ષણ, કૃષિ, નાણાંકીય સેવાઓ સહિતના અનેક મહત્વપૂર્ણ ક્ષેત્રોની સરકારી યોજનાઓ અંગે માહિતી આપવામાં આવી રહી છે, જેનો લાભ 25 હજારથી વધુ વિદ્યાર્થીઓ અને સામાન્ય નાગરિકોને મળશે.

મીડિયા સાથે વાતચીત દરમિયાન દિનેશ મકવાણાએ જણાવ્યું કે વડાપ્રધાન નરેન્દ્ર મોદીના 'વિકસિત ભારત 2047'ના વિઝનને ધ્યાનમાં રાખીને ગુજરાત સરકારના વિવિધ વિભાગોએ પોતાની યોજનાઓ અને ઉપલબ્ધિઓનું પ્રદર્શન કર્યું છે. તેમણે વિશ્વાસ વ્યક્ત કર્યો કે અમદાવાદ સહિત સમગ્ર વિસ્તારના લોકોને આ પ્રદર્શનથી નોંધપાત્ર લાભ મળશે.

એએમસી સ્ટેન્ડિંગ કમિટીના અધ્યક્ષ કમલેશ પટેલે જણાવ્યું કે, ત્રણ દિવસીય આ પ્રદર્શનનું આયોજન ગૌરવની બાબત છે. તેમાં કેન્દ્ર સરકાર અને ગુજરાત સરકારના મળીને 50થી વધુ સ્ટોલ મૂકવામાં આવ્યા છે.

તેમણે જણાવ્યું કે, ત્રણ દિવસ દરમિયાન 25 હજારથી વધુ લોકો પ્રદર્શનની મુલાકાત લેશે અને વિવિધ સરકારી યોજનાઓ વિશે માહિતી મેળવશે. ઘણી યોજનાઓ એવી હોય છે. જેના વિશે સામાન્ય લોકોને પૂરતી જાણકારી હોતી નથી. સાંસદ દિનેશ મકવાણાની પહેલના કારણે આ પ્રદર્શનનું આયોજન કરવામાં આવ્યું છે, જેથી અમદાવાદના નાગરિકોને સરકારી યોજનાઓ અંગે યોગ્ય માર્ગદર્શન મળી શકે.

આ પ્રદર્શન સામાન્ય નાગરિકો, બિનસરકારી સંસ્થાઓ (NGO) અને વિવિધ વ્યવસાયિક જૂથો માટે પણ ઉપયોગી સાબિત થશે. અહીં વિઝ્યુઅલ પ્રેઝન્ટેશન, ઇન્ટરેક્ટિવ સત્રો અને અધિકારીઓના માર્ગદર્શન દ્વારા આરોગ્ય વીમા, કૃષિ સબસિડી, શિક્ષણ લોન, રોજગારની તકો, સંરક્ષણ ભરતી તેમજ નાણાકીય સમાવેશ જેવી કેન્દ્ર અને રાજ્ય સરકારની વિવિધ યોજનાઓ વિશે વિસ્તૃત માહિતી આપવામાં આવી રહી છે.

પ્રદર્શનમાં વિવિધ વિભાગોના નિષ્ણાત અધિકારીઓ લોકોના પ્રશ્નોના જવાબ આપી રહ્યા છે. તેમજ અરજી પ્રક્રિયા અંગે પણ માર્ગદર્શન આપી રહ્યા છે. ઘણા વિભાગોએ ડિજિટલ ટૂલ્સ અને એપ્લિકેશન દ્વારા યોજનાઓને વધુ સરળ અને સુલભ બનાવવાના પ્રયાસો પણ રજૂ કર્યા છે. આવી પ્રદર્શનો લોકોમાં જાગૃતિ ફેલાવવાની સાથે સરકારી યોજનાઓ વધુમાં વધુ પાત્ર લાભાર્થીઓ સુધી પહોંચાડવામાં મહત્વપૂર્ણ ભૂમિકા ભજવે છે.

સાસા ફાઉન્ડેશન દ્વારા આયોજિત આ પ્રદર્શન મણિનગરથી શરૂ થઈ સમગ્ર ગુજરાતમાં 'સમૃદ્ધ ગુજરાત 2026'ના ઉદ્દેશ્યને આગળ વધારવા માટે એક મહત્વપૂર્ણ પહેલ માનવામાં આવી રહી છે.