લંડન/નવી દિલ્હી: અદાણી ગ્રીન એનર્જી લિમિટેડ (AGEL)ના એક્ઝિક્યુટિવ ડિરેક્ટર સાગર અદાણીએ ઊર્જા સુરક્ષા મજબૂત કરવા અને આર્થિક વિકાસને ગતિ આપવા માટે દેશમાં ઝડપથી વિદ્યુતીકરણ વધારવાની જરૂરિયાત પર ભાર મૂક્યો છે.

લંડન ક્લાઈમેટ એક્શન વીક દરમિયાન યોજાયેલા કાર્યક્રમમાં તેમણે જણાવ્યું કે ઊર્જા સંગ્રહ (Energy Storage) સાથે જોડાયેલી નવીનીકરણીય ઊર્જા જ ભવિષ્યમાં વિશ્વસનીય, સસ્તી અને 24x7 સ્વચ્છ વીજળી પૂરી પાડવાનો મુખ્ય આધાર બનશે.

સાગર અદાણીએ કહ્યું કે ઊર્જા સુરક્ષા, ખર્ચ અને સ્થિરતા આજના સમયમાં સૌથી મોટી વૈશ્વિક પડકારો છે અને તેનો અસરકારક ઉકેલ ઝડપી વિદ્યુતીકરણમાં જ સમાયેલો છે. તેમણે ઉમેર્યું કે જે દેશ આર્થિક વિકાસ અને ઊર્જા આત્મનિર્ભરતા ઈચ્છે છે, તેમના માટે વિદ્યુતીકરણ હવે વિકલ્પ નહીં પરંતુ આવશ્યકતા બની ગયું છે.

તેમણે વધુમાં જણાવ્યું કે બેટરી એનર્જી સ્ટોરેજ સિસ્ટમ (BESS) અને પમ્પ્ડ સ્ટોરેજ જેવી ટેકનોલોજી સાથે જોડાયેલી નવીનીકરણીય ઊર્જા જ સ્વચ્છ ઊર્જાને સતત ઉપલબ્ધ બનાવવામાં મહત્વપૂર્ણ ભૂમિકા ભજવે છે.

કાર્યક્રમ દરમિયાન વિશ્વના અનેક નીતિનિર્માતાઓ, રોકાણકારો અને ઊર્જા નિષ્ણાતોએ પણ સ્વચ્છ ઊર્જા પરિવર્તનને ઝડપ આપવા માટે નીતિ અને રોકાણ વધારવાની જરૂરિયાત પર ચર્ચા કરી હતી.

અદાણી ગ્રુપે 2030 સુધીમાં 50 ગીગાવોટ નવીનીકરણીય ઊર્જા ક્ષમતા હાંસલ કરવાનો લક્ષ્યાંક રાખ્યો છે અને ઊર્જા પરિવર્તન ક્ષેત્રમાં 100 અબજ ડોલરથી વધુનું રોકાણ કરવાનો સંકલ્પ પણ કર્યો છે.