અભિનેતા અને રાજકારણી રવિ કિશને પોતાના સંઘર્ષમય જીવનનો ભાવુક પ્રસંગ શેર કરતાં જણાવ્યું કે 1990ના દાયકામાં જ્યારે અનેક કલાકારો સ્ટાર બની રહ્યા હતા, ત્યારે તેઓ તેમની મજાક ઉડાવતા અને અવગણતા હતા. છતાં તેમણે ધીરજ, મહેનત અને આત્મવિશ્વાસ જાળવી રાખ્યો, જેના પરિણામે 34 વર્ષ બાદ તેમને યોગ્ય ઓળખ અને સન્માન મળ્યું.

એક રિયાલિટી શોમાં સહ-સ્પર્ધકો સાથે વાતચીત દરમિયાન રવિ કિશને કહ્યું કે તેઓએ અભિનય ક્ષેત્રમાં સફળતા મેળવવા માટે પોતાને સંપૂર્ણ રીતે તૈયાર કર્યા હતા. તેમણે અવાજ પર કામ કર્યું, ઘોડેસવારી, એક્શન, ઉર્દૂ અને હિન્દી ભાષાનું જ્ઞાન મેળવ્યું, સાથે જ થિયેટર અને નૃત્યની તાલીમ પણ લીધી હતી. તેમ છતાં તેમને લાંબા સમય સુધી સફળતા મળી નહોતી, જ્યારે અન્ય કલાકારો સતત આગળ વધી રહ્યા હતા.

રવિ કિશને જણાવ્યું કે તેઓ હંમેશા પોતાને કહેતા કે જેમ બીજાનો સમય આવ્યો છે તેમ એક દિવસ તેમનો પણ આવશે. જોકે તેમને ખબર નહોતી કે આ તક મેળવવા માટે 34 વર્ષ રાહ જોવી પડશે. તેમણે કહ્યું કે આખરે એક એવો સમય આવ્યો જ્યારે તેમની અભિનય પ્રતિભાને વ્યાપક પ્રશંસા મળી અને તે વર્ષે તેમણે શ્રેષ્ઠ અભિનેતાના અનેક એવોર્ડ પોતાના નામે કર્યા. જે મંચો પર પહેલાં તેમને આમંત્રણ પણ મળતું નહોતું, ત્યાં આજે તેઓ સન્માનિત મહેમાન તરીકે ઉભા રહ્યા.

તેમની આ સંઘર્ષગાથાએ શોમાં હાજર અન્ય સ્પર્ધકોને પણ પ્રેરિત કર્યા અને અનેક લોકો ભાવુક બન્યા.

રવિ કિશને 1990ના દાયકાની શરૂઆતમાં હિન્દી ફિલ્મો 'પીતાંબર','આતંક', 'આર્મી' અને 'જખ્મી દિલ'થી કારકિર્દીની શરૂઆત કરી હતી. જોકે તેમને સૌથી મોટી લોકપ્રિયતા ભોજપુરી ફિલ્મ ઉદ્યોગમાં 'સૈયાં હમાર' અને 'પંડિત જી બતાઈ ના બિયાહ કબ હોઈ' જેવી સુપરહિટ ફિલ્મોથી મળી. છેલ્લા કેટલાક વર્ષોમાં'લાપતા લેડીઝ' ફિલ્મ અને 'ખાકી: ધ બિહાર ચેપ્ટર' વેબ સિરીઝમાં તેમના અભિનયને દર્શકો અને સમીક્ષકો તરફથી ભારે પ્રશંસા મળી છે, જેના કારણે તેઓ ફરી એકવાર સશક્ત અભિનેતા તરીકે સ્થાપિત થયા છે.