રાજકોટ: રાજકોટના કુવાડવા પોલીસ સ્ટેશન નજીક એક અજાણ્યા યુવકનો મૃતદેહ મળી આવતા વિસ્તારમાં ચકચાર મચી ગઈ છે. ઘટનાની જાણ થતાં પોલીસ તાત્કાલિક સ્થળ પર પહોંચી હતી અને મૃતદેહનો કબજો મેળવી તેને પોસ્ટમોર્ટમ માટે હોસ્પિટલ ખસેડવામાં આવ્યો હતો. હાલ આ મામલે મૃત્યુનું કારણ જાણવા પોલીસ તપાસ ચલાવી રહી છે.

પ્રાથમિક તપાસમાં મૃતક ભિક્ષુક હોવાનું સામે આવ્યું છે. જોકે તેનું મોત કુદરતી કારણોસર થયું છે કે પછી તેની પાછળ કોઈ ગુનાહિત કૃત્ય જવાબદાર છે, તે અંગે હજુ સ્પષ્ટતા થઈ નથી.

આજે વહેલી સવારે સ્થાનિક લોકોને પોલીસ સ્ટેશન નજીક યુવકનો મૃતદેહ દેખાતા પોલીસને જાણ કરવામાં આવી હતી. માહિતી મળતા જ પોલીસની ટીમ ઘટના સ્થળે પહોંચી હતી અને જરૂરી કાર્યવાહી હાથ ધરી હતી.

પોલીસે મૃતકની ઓળખ અને મૃત્યુના ચોક્કસ કારણ અંગે તપાસ શરૂ કરી છે. પોસ્ટમોર્ટમ રિપોર્ટ બાદ સમગ્ર ઘટનાક્રમ અંગે વધુ વિગતો સામે આવે તેવી શક્યતા છે.