PM મોદી IIT દિલ્હીના 57મા દીક્ષાંત સમારોહને કરશે સંબોધન, ‘પરમ પ્રજ્ઞા’ સુપરકમ્પ્યુટિંગ સેન્ટરનું કરશે ઉદ્ઘાટન

વડાપ્રધાન નરેન્દ્ર મોદી આજે ભારતીય પ્રૌદ્યોગિકી સંસ્થા (IIT) દિલ્હીના 57મા દીક્ષાંત સમારોહમાં મુખ્ય અતિથિ તરીકે ઉપસ્થિત રહેશે. સવારે 11 વાગ્યે શરૂ થનારા સમારોહમાં તેઓ ડિગ્રી મેળવનારા 3,000થી વધુ વિદ્યાર્થીઓને સંબોધશે. આ દરમિયાન IIT દિલ્હીના સોનીપત કેમ્પસમાં સ્થાપિત AI આધારિત હાઈ-પરફોર્મન્સ સુપરકમ્પ્યુટિંગ સેન્ટર ‘પરમ પ્રજ્ઞા’નું પણ ઉદ્ઘાટન કરશે.

દીક્ષાંત સમારોહ દરમિયાન 3,000થી વધુ વિદ્યાર્થીઓને ડિગ્રી એનાયત કરવામાં આવશે, જેમાં 587 પીએચડી સ્કોલર્સનો પણ સમાવેશ થાય છે. વડાપ્રધાન ઉત્કૃષ્ટ શૈક્ષણિક પ્રદર્શન કરનારા વિદ્યાર્થીઓને IIT દિલ્હીના પ્રતિષ્ઠિત એકેડેમિક એવોર્ડ્સ પણ એનાયત કરશે. તેમાં પ્રેસિડેન્ટ્સ ગોલ્ડ મેડલ, ડિરેક્ટર્સ ગોલ્ડ મેડલ, શંકર દયાલ શર્મા ગોલ્ડ મેડલ અને પરફેક્ટ ટેન ગોલ્ડ મેડલનો સમાવેશ થાય છે.

‘પરમ પ્રજ્ઞા’ કેન્દ્ર આર્ટિફિશિયલ ઇન્ટેલિજન્સ, ડેટા સાયન્સ, એડવાન્સ્ડ કમ્પ્યુટિંગ અને આંતરવિષયક સંશોધન ક્ષેત્રે IIT દિલ્હીની ક્ષમતાઓને વધુ મજબૂત બનાવશે. સંસ્થાના ડિરેક્ટર રંગન બેનર્જીએ જણાવ્યું હતું કે IIT દિલ્હીએ દેશની 18 નેશનલ ઇન્સ્ટિટ્યૂટ્સ ઓફ ટેક્નોલોજી સાથે એમઓયુ કરીને શૈક્ષણિક અને સંશોધન સહયોગનું નેટવર્ક શરૂ કર્યું છે.

આ ઉપરાંત IIT દિલ્હી અને સિસ્કોએ તાજેતરમાં AI તથા સાયબર સિક્યુરિટી ક્ષેત્રે ‘સિસ્કો ટેક્નોલોજી હબ’ શરૂ કરવાની જાહેરાત કરી હતી. આ સહયોગનો ઉદ્દેશ સંશોધન, કૌશલ્ય વિકાસ અને મજબૂત ડિજિટલ ઇકોસિસ્ટમને પ્રોત્સાહન આપવાનો છે.