દાહોદ: દાહોદ જિલ્લાના દેવગઢ બારિયા તાલુકાના પીપલોદ ગામમાં આવેલી જૂની રેલવે ફાટક આજે પણ હજારો લોકો માટે જીવલેણ માર્ગ બની રહી છે. મેન બજાર નજીક અને જુના રણધીકપુર રોડ વિસ્તારમાં આવેલી આ ફાટક પરથી રોજિંદી અવરજવર કરતા લોકો વર્ષોથી જીવના જોખમે રેલવે ટ્રેક ક્રોસ કરવા મજબૂર બન્યા છે. સ્થાનિકોના આક્ષેપ મુજબ અનેક રજૂઆતો છતાં તંત્ર દ્વારા હજુ સુધી કોઈ અસરકારક કાર્યવાહી કરવામાં આવી નથી.

દરરોજ હજારો લોકો કરે છે જોખમી અવરજવર

આ માર્ગ પરથી પીપલોદની મધ્યસ્થ શાળા, કમલ હાઈસ્કૂલ અને તેજસ વિદ્યાલયના આશરે 2,000થી વધુ વિદ્યાર્થીઓ રોજ પસાર થાય છે. ઉપરાંત દેવગઢ બારિયાની વિવિધ કોલેજોમાં અભ્યાસ માટે જતા અંદાજે 800 વિદ્યાર્થીઓ તેમજ આસપાસના 60થી 70 ગામોના 4,000થી વધુ લોકો પણ આ માર્ગનો ઉપયોગ કરે છે. પરિણામે દરરોજ હજારો લોકો અકસ્માતના ભય વચ્ચે રેલવે ટ્રેક ઓળંગી રહ્યા છે.

20 વર્ષથી ફૂટ ઓવરબ્રિજની માંગ

સ્થાનિક રહેવાસીઓના જણાવ્યા મુજબ છેલ્લા બે દાયકાથી અહીં ફૂટ ઓવરબ્રિજ બનાવવાની માંગ કરવામાં આવી રહી છે. અનેક વખત જાહેર જાહેરાતો અને ખાતમુહૂર્તની વાતો થઈ હોવા છતાં કામગીરી આગળ વધી નથી. હાલ જે ઓવરબ્રિજ છે તે માત્ર વાહન વ્યવહાર માટે ઉપયોગી છે, જ્યારે પગપાળા જતા લોકોને લગભગ ત્રણ કિલોમીટરનો વધારાનો ફેરો કરવો પડે છે.

અકસ્માતોની અનેક ઘટનાઓ છતાં તંત્ર નિષ્ક્રિય

સ્થાનિકોના જણાવ્યા પ્રમાણે વર્ષો દરમિયાન આ વિસ્તારમાં અનેક રેલવે અકસ્માતો અને જાનહાનિના બનાવો બની ચૂક્યા છે. તેમ છતાં રેલવે વિભાગ અને સંબંધિત તંત્ર દ્વારા કાયમી ઉકેલ લાવવા માટે કોઈ નક્કર પગલાં લેવામાં આવ્યા નથી. જેના કારણે લોકોમાં ભારે રોષ જોવા મળી રહ્યો છે.

મોટી દુર્ઘટના પહેલાં કાર્યવાહી કરવાની માંગ

ગ્રામજનોએ રેલવે વિભાગ, જિલ્લા વહીવટીતંત્ર, સાંસદ અને અન્ય લોકપ્રતિનિધિઓને તાત્કાલિક ફૂટ ઓવરબ્રિજના નિર્માણ માટે રજૂઆત કરી છે. સ્થાનિકોનું કહેવું છે કે જો સમયસર યોગ્ય વ્યવસ્થા નહીં કરવામાં આવે તો કોઈ મોટી દુર્ઘટના સર્જાઈ શકે છે. લોકો હવે તંત્ર પાસે માત્ર આશ્વાસન નહીં, પરંતુ વાસ્તવિક કામગીરીની અપેક્ષા રાખી રહ્યા છે.