Surat : ભૂગર્ભ જળ સંરક્ષણ માટે મોટો પ્રોજેક્ટ, CR પાટીલના હસ્તે કરાયું ખાતમુહૂર્ત
વડાપ્રધાન નરેન્દ્ર મોદીના જન્મદિવસ નિમિત્તે સુરતમાં કેન્દ્રીય જળશક્તિ મંત્રી સી.આર. પાટીલે તેમને જન્મદિવસની શુભેચ્છા પાઠવી હતી. આ સાથે સુરત મહાનગરપાલિકા દ્વારા ભૂગર્ભ જળ સંરક્ષણ માટે હાથ ધરાયેલા મહત્વના પ્રોજેક્ટનું ખાતમુહૂર્ત પણ તેમના હસ્તે કરવામાં આવ્યું.
સુરત મહાનગરપાલિકાના સાઉથ ઝોન-એ એટલે કે ઉધના વિસ્તારમાં ભૂગર્ભ જળનું સ્તર વધારવા માટે 151 વિવિધ સ્થળોએ રિચાર્જ બોરવેલ બનાવવામાં આવશે. આ સમગ્ર પ્રોજેક્ટ પાછળ અંદાજે રૂ. 2.5 કરોડનો ખર્ચ થવાનો હોવાનું જણાવાયું છે.
કાર્યક્રમમાં શહેરના મેયર સહિત ધારાસભ્યો અને અન્ય આગેવાનો ઉપસ્થિત રહ્યા હતા. રિચાર્જ બોરવેલના માધ્યમથી વરસાદી પાણીને જમીનમાં ઉતારી ભૂગર્ભ જળના સ્તરમાં વધારો કરવાનો પ્રયાસ કરવામાં આવશે. સાથે જ પાણીના સંરક્ષણથી જમીનની સ્થિતિમાં પણ સુધારો થવાની આશા વ્યક્ત કરવામાં આવી છે.
આ પ્રસંગે સી.આર. પાટીલે વોટર હાર્વેસ્ટિંગના મહત્વ પર ભાર મૂક્યો હતો. તેમણે જણાવ્યું કે વરસાદી પાણીને વેડફાવાના બદલે તેને જમીનમાં ઉતારીને ભૂગર્ભ જળનું સંરક્ષણ કરવું જરૂરી છે. તેમણે આ પ્રકારની કામગીરીને ધરતી માતાનું ઋણ ચૂકવવાનો પ્રયાસ ગણાવ્યો હતો.
સુરતમાં શરૂ થયેલો આ પ્રોજેક્ટ વરસાદી પાણીના સંચય અને ભૂગર્ભ જળના પુનઃભરણની દિશામાં મહત્વપૂર્ણ કામગીરી બની શકે છે.
