Aravalli : ભાજપ પ્રદેશ અધ્યક્ષ જગદીશ વિશ્વકર્માએ મોડાસામાં યુવાનો સાથે સંવાદ કર્યો, 'વિસામો' સેવા કેમ્પની મુલાકાત લીધી

અરવલ્લી જિલ્લાના મોડાસા ખાતે 'સેવા સંકલ્પ અભિયાન' અંતર્ગત વિવિધ કાર્યક્રમો યોજાયા હતા. ભાજપા પ્રદેશ અધ્યક્ષ જગદીશ વિશ્વકર્માએ આજે મોડાસા ખાતે યુવાનો સાથે સંવાદ કરી વિકસિત ભારતના નિર્માણમાં યુવાનોની ભૂમિકા અંગે ચર્ચા કરી હતી. આ પ્રસંગે તેઓ 'વડનગરથી વારાણસી' બાઈક સેવા યાત્રામાં પણ સહભાગી થયા હતા.

ભાદરવી પૂનમના પાવન અવસરે મોટી સંખ્યામાં શ્રદ્ધાળુઓ પગપાળા અંબાજી ધામ તરફ પ્રયાણ કરી રહ્યા છે. અંબાજી જતા પદયાત્રિકોને માર્ગમાં જરૂરી સુવિધા મળી રહે તે માટે અરવલ્લી જિલ્લા ભાજપ સંગઠન દ્વારા 'વિસામો' નામે પદયાત્રી સેવા કેમ્પ શરૂ કરવામાં આવ્યો છે.

જગદીશ વિશ્વકર્માએ આ સેવા કેમ્પની મુલાકાત લઈ પદયાત્રિકો સાથે મુલાકાત કરી હતી. તેમણે માઈભક્તોને આપવામાં આવતી વિવિધ સેવાઓની માહિતી મેળવી હતી અને શ્રદ્ધાળુઓ સાથે આત્મીય સંવાદ પણ સાધ્યો હતો. સેવા કેમ્પમાં પદયાત્રિકોની સુવિધા માટે કરવામાં આવેલી વ્યવસ્થાઓની પણ તેમણે મુલાકાત લીધી હતી.

આ પ્રસંગે વિશ્વકર્માએ 'સેવા એ જ સંગઠન'ની ભાવનાને આગળ વધારતા કાર્યકર્તાઓ દ્વારા કરવામાં આવતી સેવા પ્રવૃત્તિઓની જાણકારી મેળવી હતી. અંબાજી તરફ જતા પદયાત્રિકો માટે માર્ગમાં આવા સેવા કેમ્પો મહત્વપૂર્ણ બની રહ્યા છે.

મોડાસા ખાતે આયોજિત કાર્યક્રમોમાં પ્રદેશ મંત્રી અને અરવલ્લી જિલ્લાના પ્રભારી સંજય દેસાઈ, જિલ્લા ભાજપ અધ્યક્ષ ભીખાજી ઠાકોર, સાંસદ શોભનાબેન બારૈયા સહિત ભાજપના આગેવાનો, હોદ્દેદારો અને કાર્યકર્તાઓ ઉપસ્થિત રહ્યા હતા.

'સેવા સંકલ્પ અભિયાન' અંતર્ગત બાઈક યાત્રા અને પદયાત્રી સેવા કેમ્પના કાર્યક્રમો દરમિયાન કાર્યકર્તાઓમાં પણ ઉત્સાહ જોવા મળ્યો હતો. યાત્રા અને સેવા પ્રવૃત્તિઓ સાથે જોડાયેલા કાર્યકર્તાઓએ મોટી સંખ્યામાં ભાગ લીધો હતો.