France Riots: યુરોપની સૌથી પ્રતિષ્ઠિત ફૂટબોલ ટુર્નામેન્ટ, UEFA ચેમ્પિયન્સ લીગ જીત્યા બાદ ફ્રેન્ચ ક્લબ પેરિસ સેન્ટ-જર્મનના (PSG) સમર્થકો દ્વારા ઉજવણી રાજધાનીના અનેક ભાગોમાં હિંસા અને અશાંતિમાં ફેરવાઈ ગઈ હતી. મોડી રાત સુધી હજારો ચાહકો રસ્તાઓ પર ઉતરી આવ્યા હતા, પરંતુ કેટલાક વિસ્તારોમાં પરિસ્થિતિ કાબુ બહાર થઈ ગઈ હતી. જેના કારણે આગચંપી, તોડફોડ અને પોલીસ સાથે અથડામણની ઘટનાઓ બની હતી.

અહેવાલો અનુસાર, ચેમ્પિયન્સ લીગ ફાઇનલમાં PSGની જીત બાદ શહેરના મુખ્ય વિસ્તારો, ખાસ કરીને આર્ક ડી ટ્રાયોમ્ફ અને ચેમ્પ્સ-એલિસીસમાં લગભગ 20,000 સમર્થકો એકઠાં થયા હતા. લોકોએ જ્વાળાઓ પ્રગટાવી, ફટાકડાં ફોડી અને સૂત્રોચ્ચાર કરીને વિજયની ઉજવણી કરી હતી. સવારે 3 વાગ્યા પછી પણ આગચંપી, લૂંટફાટ, તોડફોડ અને પોલીસ સાથે અથડામણની ઘટનાઓ ચાલુ રહી હતી. ઘણા વિસ્તારોમાં પરિસ્થિતિ તંગ રહી અને સેંકડો લોકોની ધરપકડ કરવામાં આવી હતી.

ઉજવણી દરમિયાન કેટલાક તોફાનીઓએ દુકાનો અને જાહેર સંપત્તિને નિશાન બનાવી હતી. અનેક વાહનોને આગ ચાંપી દેવામાં આવી હતી અને પોલીસ સ્ટેશન પર હુમલો કરવાનો પ્રયાસ કરવામાં આવ્યો હતો. પરિસ્થિતિને કાબૂમાં લેવા માટે પોલીસે બળપ્રયોગ કર્યો હતો, જેના કારણે અનેક સ્થળોએ અથડામણો થઈ હતી. મીડિયા અહેવાલો અનુસાર, એફિલ ટાવરની આસપાસ પણ આગ લગાડવાની ઘટનાઓ નોંધાઈ હતી. જો કે, ઉપલબ્ધ માહિતી સૂચવે છે કે, આગની સીધી અસર એફિલ ટાવર પર થઈ ન હતી, પરંતુ તેની આસપાસના વિસ્તારોમાં થઈ હતી.

અધિકારીઓએ જણાવ્યું હતું કે, પરિસ્થિતિ વણસ્યા પછી, મોટી સંખ્યામાં પોલીસ દળો તૈનાત કરવામાં આવ્યા હતા. રાત્રે 10 વાગ્યા સુધીમાં સેંકડો લોકોની અટકાયત કરવામાં આવી હતી. અથડામણ દરમિયાન ઓછામાં ઓછા એક પોલીસકર્મી ઘાયલ થયા હતા. પેરિસના મુખ્ય રિંગ રોડ પર ભારે જામ હતો અને ઘણા વિસ્તારોમાં ટ્રાફિક પ્રભાવિત થયો હતો. ગયા વર્ષે પણ પીએસજીની જીત પછી ઉજવણી દરમિયાન હિંસા થઈ હતી, જેમાં બે લોકોના મોત પણ થયા હતા. આ અનુભવને ધ્યાનમાં રાખીને આ વખતે ફ્રાન્સમાં લગભગ 22,000 પોલીસકર્મીઓ અને ફક્ત પેરિસમાં 8,000 પોલીસકર્મીઓ તૈનાત કરવામાં આવ્યા હતા.

તેમ છતાં કેટલાક સ્થળોએ તોફાનીઓએ સુરક્ષા વ્યવસ્થાને પડકારી અને હિંસા ફેલાવી હતી. પીએસજીનો ઐતિહાસિક વિજય ફ્રાન્સ માટે ગર્વની ક્ષણ હતી, પરંતુ ઉજવણીની હિંસા અને આગચંપીથી છબી કલંકિત થઈ ગઈ હતી. અધિકારીઓ હવે નુકસાનનું મૂલ્યાંકન કરી રહ્યા છે અને હિંસામાં સામેલ લોકોની ઓળખ કરવા માટે તપાસ કરી રહ્યા છે.