Pakistan HIV Infection: પાકિસ્તાનના પંજાબ પ્રાંતમાંથી એક ચોંકાવનારા સમાચાર સામે આવ્યા છે. બીબીસીની એક ગુપ્ત તપાસમાં તૌંસાની THQ હોસ્પિટલમાં ચાલી રહેલા ભયાનક કૌભાંડનો પર્દાફાશ થયો છે. ત્યાંના આરોગ્ય કર્મચારીઓએ પૈસા બચાવવા માટે અથવા બેદરકારીને કારણે એક જ સિરીંજનો ઘણી વખત ઉપયોગ કર્યો હતો. પરિણામે આ વિસ્તારના 300થી વધુ બાળકો જીવલેણ રોગ HIVનો ભોગ બન્યા છે.

એક દર્દનાક વાર્તા:પાકિસ્તાનના પંજાબ પ્રાંતમાંથી એક ચોંકાવનારા સમાચાર સામે આવ્યા છે. બીબીસીની એક ગુપ્ત તપાસમાં તૌંસાની THQ હોસ્પિટલમાં ચાલી રહેલા ભયાનક રમતનો પર્દાફાશ થયો છે. ત્યાંના આરોગ્ય કર્મચારીઓએ પૈસા બચાવવા માટે અથવા બેદરકારીને કારણે એક જ સિરીંજનો ઘણી વખત ઉપયોગ કર્યો હતો. પરિણામે, આ વિસ્તારના 300 થી વધુ બાળકો આ જીવલેણ રોગ HIVનો ભોગ બન્યા છે.

8 વર્ષના મોહમ્મદ અમીનનું મૃત્યુ
8 વર્ષના મોહમ્મદ અમીન આ દુર્ઘટનાનો ભોગ બન્યો છે. અમીનની માતાએ રડતા રડતા કહ્યુ કે, તેના પુત્રને નાની સારવાર માટે સરકારી હોસ્પિટલમાં લઈ જવામાં આવ્યો હતો. પાછા ફર્યા પછી તેને ખૂબ તાવ અને અસહ્ય દુખાવો થયો હતો. પરીક્ષણમાં જાણવા મળ્યું કે તેને HIV છે. થોડા દિવસોમાં અમીનનું મૃત્યુ થયું અને હવે તેની બહેન અસ્મા પણ HIV પોઝિટિવ આવી છે. પરિવારનો આરોપ છે કે, હોસ્પિટલમાં વપરાતી ગંદી સોય તેમના બાળકોના જીવનને જોખમમાં મૂકે છે.

તપાસમાં ચોંકાવનારા ખુલાસા
બીબીસીએ લગભગ 32 કલાક સુધી હોસ્પિટલની અંદર ગુપ્ત રીતે તપાસ કરી હતી, જેમાં આરોગ્ય નિયમોનું ઉલ્લંઘન થતું જોવા મળ્યું હતું. સ્ટાફ એક જ સિરીંજનો ઉપયોગ કરીને વારંવાર શીશીઓમાંથી દવા કાઢી રહ્યો હતો. નિષ્ણાતોના મતે જો સોય બદલવામાં આવે તો પણ વાયરસ સિરીંજના પાછળના ભાગમાં રહે છે, જે આખી દવાને ઝેરી બનાવે છે. વપરાયેલી સોય અને ખુલ્લી દવાઓ હોસ્પિટલના કાઉન્ટર પર વેરવિખેર હતી. નર્સો મોજા પહેર્યા વિના ઇન્જેક્શન આપતી જોવા મળી હતી. એટલું જ નહીં, તબીબી કચરાનો યોગ્ય રીતે નિકાલ કરવાને બદલે, તેને સામાન્ય સ્થળોએ ફેંકવામાં આવી રહ્યો હતો.

મજબૂત પુરાવા હોવા છતાં હોસ્પિટલે આરોપો નકાર્યા
નવેમ્બર 2024થી ઓક્ટોબર 2025 દરમિયાન કુલ 331 બાળકોનો HIV ટેસ્ટ પોઝિટિવ આવ્યો હતો. આટલા મજબૂત પુરાવા હોવા છતાં, હોસ્પિટલના મેડિકલ સુપરિન્ટેન્ડેન્ટ ડૉ. કાસિમ બુઝદારે આરોપોને સ્પષ્ટપણે નકારી કાઢ્યા છે. તેમનો દાવો છે કે, આ વીડિયો જૂનો હોઈ શકે છે અથવા હોસ્પિટલને બદનામ કરવા માટે બનાવવામાં આવ્યો હોઈ શકે છે. તેમણે જણાવ્યું હતું કે, તેમના કાર્યકાળ દરમિયાન પૂરતા સુરક્ષા પગલાં લેવામાં આવ્યા છે.