નવી દિલ્હી ભારતીય લોકકલાને વૈશ્વિક ઓળખ અપાવનાર પ્રખ્યાત પંડવાણી ગાયિકા અને પદ્મ વિભૂષણથી સન્માનિત તીજન બાઈનું નિધન થતાં સમગ્ર દેશમાંથી શોકની લાગણી વ્યક્ત થઈ રહી છે. તેમના અવસાનને માત્ર છત્તીસગઢ જ નહીં પરંતુ સમગ્ર ભારતીય સાંસ્કૃતિક વારસા માટે મોટી ખોટ માનવામાં આવી રહી છે.

રાષ્ટ્રપતિ દ્રૌપદી મુર્મુએ પોતાના શોક સંદેશમાં જણાવ્યું કે તીજન બાઈએ પોતાની શક્તિશાળી વાણી, જીવંત અભિવ્યક્તિ અને અનોખી રજૂઆતથી મહાભારતની કથાઓને મંચ પર જીવંત બનાવી હતી. વર્ષોની સાધના અને અસાધારણ પ્રતિભાના બળે તેમણે છત્તીસગઢની પંડવાણી પરંપરાને દેશ-વિદેશમાં આગવી ઓળખ અપાવી હતી. રાષ્ટ્રપતિએ તેમના પરિવારજનો અને ચાહકો પ્રત્યે સંવેદના વ્યક્ત કરી હતી.

કેન્દ્રીય ગૃહમંત્રી અમિત શાહે સોશિયલ મીડિયા પર લખ્યું કે પદ્મ વિભૂષણ તીજન બાઈનું નિધન ભારતીય લોકકલા જગત માટે અપૂરણીય ક્ષતિ છે. તેમની અનોખી પ્રતિભા અને સમર્પણના કારણે પંડવાણી લોકકલાને નવી ઓળખ મળી હતી. તેમણે પ્રાર્થના કરી કે ઈશ્વર દિવંગત આત્માને શાંતિ આપે અને પરિવારને આ દુઃખ સહન કરવાની શક્તિ આપે.

છત્તીસગઢના મુખ્યમંત્રી વિષ્ણુદેવ સાયે રાયપુર AIIMS પહોંચીને તીજન બાઈના પાર્થિવ દેહને પુષ્પાંજલિ અર્પણ કરી હતી. તેમણે જણાવ્યું કે તીજન બાઈએ પોતાની કળા દ્વારા પંડવાણીને વિશ્વસ્તરે પહોંચાડી હતી. રાજ્ય સરકારે તેમના અંતિમ સંસ્કારને રાજકીય સન્માન સાથે કરવાની જાહેરાત પણ કરી છે.

ઉત્તર પ્રદેશના મુખ્યમંત્રી યોગી આદિત્યનાથે પણ તેમના નિધન પર શોક વ્યક્ત કરતાં જણાવ્યું કે તીજન બાઈએ પોતાની સંગીતસાધના અને અનોખી અભિવ્યક્તિ દ્વારા ભારતીય લોકકલાને નવી ઊંચાઈઓ પર પહોંચાડી હતી. તેમનું યોગદાન હંમેશા યાદ રહેશે.

છત્તીસગઢ વિધાનસભાના અધ્યક્ષ રમણ સિંહે જણાવ્યું કે આજે પંડવાણીનો એક અમૂલ્ય સ્વર સદાકાળ માટે શાંત થઈ ગયો છે. જ્યારે પૂર્વ મુખ્યમંત્રી અને કોંગ્રેસના નેતા ભૂપેશ બઘેલે કહ્યું કે તીજન બાઈએ પોતાના ગાયન દ્વારા પંડવાણી પરંપરાને જીવંત રાખી અને વિશ્વભરમાં છત્તીસગઢનું ગૌરવ વધાર્યું હતું.

તીજન બાઈએ જીવનભર લોકસંસ્કૃતિના જતન અને પ્રચાર માટે કરેલા યોગદાન બદલ તેમને પદ્મશ્રી, પદ્મભૂષણ અને અંતે દેશના બીજા સર્વોચ્ચ નાગરિક સન્માન પદ્મ વિભૂષણથી નવાજવામાં આવ્યા હતા. તેમના નિધનથી ભારતીય લોકસંગીત અને સાંસ્કૃતિક જગતમાં ક્યારેય ન ભરાઈ શકે તેવી ખોટ ઊભી થઈ છે.