યુઝવેન્દ્ર ચહલની મોટી જાહેરાત! ફર્સ્ટ ક્લાસ ક્રિકેટમાંથી નિવૃત્તિ, વનડે-ટી20 રમવાનું ચાલુ રાખશે

Yuzvendra Chahal First Class Retirement: ભારતીય લેગ સ્પિનર યુઝવેન્દ્ર ચહલે ફર્સ્ટ ક્લાસ ક્રિકેટમાંથી નિવૃત્તિ જાહેર કરી છે. તેમનો આ નિર્ણય તાત્કાલિક અસરથી લાગુ થશે. જોકે, ચહલે સ્પષ્ટ કર્યું છે કે તેઓ વનડે અને ટી20 જેવા વ્હાઇટ-બોલ ક્રિકેટના ફોર્મેટમાં રમવાનું ચાલુ રાખશે.

https://twitter.com/SahilSinghadiya/status/2105942618568077736

17 વર્ષની રેડ-બોલ ક્રિકેટની સફરનો અંત

ચહલે વર્ષ 2009માં હરિયાણા તરફથી ફર્સ્ટ ક્લાસ ક્રિકેટમાં પદાર્પણ કર્યું હતું. લગભગ 17 વર્ષની સફરમાં તેમણે 49 ફર્સ્ટ ક્લાસ મેચમાં કુલ 148 વિકેટ ઝડપી હતી. ઇંગ્લેન્ડમાં નોર્થમ્પ્ટનશાયર તરફથી લોર્ડ્સના મેદાન પર રમાયેલી મેચ તેમની છેલ્લી ફર્સ્ટ ક્લાસ મેચ બની હતી.

ટેસ્ટ રમવાનું સપનું પૂરું ન થયું

નિવૃત્તિની જાહેરાત સાથે ચહલે ભાવુક સંદેશ પણ આપ્યો હતો. તેમણે જણાવ્યું કે બાળપણમાં પહેલી વખત લાલ બોલ હાથમાં લીધો ત્યારથી રેડ-બોલ ક્રિકેટ સાથે તેમનો ખાસ લગાવ રહ્યો છે. આ ફોર્મેટે તેમને ધીરજ, મુશ્કેલીઓનો સામનો કરવાની હિંમત અને લાંબા સમય સુધી મેદાન પર સંઘર્ષ કરવાનું શીખવ્યું. ચહલે સ્વીકાર્યું કે ભારત માટે ટેસ્ટ કેપ પહેરવાનું તેમનું સપનું હતું, પરંતુ તે પૂરું થઈ શક્યું નહીં. તેમ છતાં, ફર્સ્ટ ક્લાસ ક્રિકેટમાં મળેલી તક અને અનુભવ માટે તેમણે આભાર વ્યક્ત કર્યો હતો.

વ્હાઇટ-બોલ ક્રિકેટમાં વાપસી માટે પ્રયત્ન ચાલુ રાખશે

ચહલે પોતાના સંદેશમાં સ્પષ્ટ કર્યું કે તેમની ક્રિકેટ સફર પૂરી થઈ નથી. ભારત માટે રમવાની ઇચ્છા હજુ પણ મજબૂત છે અને વનડે તથા ટી20 ક્રિકેટમાં ફરી તક મેળવવા માટે તેઓ સંપૂર્ણ મહેનત કરશે. તેમણે હરિયાણા ક્રિકેટ એસોસિએશન સહિત પોતાની સફરમાં સાથ આપનારા અધિકારીઓ અને માર્ગદર્શકોનો પણ આભાર માન્યો હતો. ફર્સ્ટ ક્લાસ ક્રિકેટમાંથી નિવૃત્તિ બાદ હવે ચહલનું ધ્યાન મર્યાદિત ઓવરના ક્રિકેટમાં પોતાની કારકિર્દી આગળ વધારવા પર રહેશે.