World Archery Para Series 2026: અમદાવાદમાં ભારતનો ડંકો! શીતલ દેવી અને રાકેશ કુમારે રચ્યો નવો વિશ્વ રેકોર્ડ

World Archery Para Series 2026: વર્લ્ડ આર્ચરી પેરા સિરીઝ 2026ના બીજા દિવસે ભારતીય પેરા તીરંદાજોએ શાનદાર પ્રદર્શન કર્યું છે. શીતલ દેવી અને રાકેશ કુમારની કમ્પાઉન્ડ મિક્સ્ડ ટીમે 1,400ના સંયુક્ત સ્કોર સાથે નવો વિશ્વ રેકોર્ડ સ્થાપિત કરીને ભારતનું નામ રોશન કર્યું છે.

શીતલ દેવી પ્રથમ, રાકેશ કુમાર બીજા સ્થાને

કમ્પાઉન્ડ મિક્સ્ડ ટીમ ક્વોલિફિકેશનમાં રાકેશ કુમારે 702 પોઈન્ટ સાથે બીજું સ્થાન મેળવ્યું હતું. તેઓ પ્રથમ ક્રમે રહેલા ઇન્ડોનેશિયાના તીરંદાજથી માત્ર બે પોઈન્ટ પાછળ રહ્યા હતા. બીજી તરફ, શીતલ દેવીએ પેરા કમ્પાઉન્ડ મહિલા ક્વોલિફિકેશનમાં પ્રથમ સ્થાન મેળવીને ભારતીય ટીમના શાનદાર પ્રદર્શનને વધુ મજબૂત બનાવ્યું હતું.

ભારતના તમામ 8 કમ્પાઉન્ડ તીરંદાજ આગળના રાઉન્ડમાં

ભારતના તમામ આઠ પેરા કમ્પાઉન્ડ તીરંદાજોએ આગામી રાઉન્ડમાં સ્થાન મેળવ્યું છે. પુરુષ વર્ગમાં રાકેશ કુમાર, તોમન કુમાર, શ્યામ સુંદર સ્વામી અને ગુરવિંદર સિંહે આગળના રાઉન્ડમાં પ્રવેશ કર્યો છે. જ્યારે મહિલા વર્ગમાં શીતલ દેવી, પાયલ નાગ, સરિતા અને લલપતીએ પણ આગામી તબક્કામાં જગ્યા બનાવી છે.

W1 વર્ગમાં પણ ભારતનું શાનદાર પ્રદર્શન

સ્પર્ધાના બીજા દિવસે W1 અને દૃષ્ટિબાધિત વર્ગની સ્પર્ધાઓ પણ યોજાઈ હતી. W1 વર્ગમાં પણ ભારતના તમામ 8 તીરંદાજોએ આગામી રાઉન્ડમાં પ્રવેશ મેળવ્યો છે. પુરુષ વર્ગમાં આદિલ મોહમ્મદ નઝીર અંસારી, નવીન દલાલ, નૂરુદ્દીન અને વિનાયક અમોલ બ્રીડ જ્યારે મહિલા વર્ગમાં સ્વાતિ ચૌધરી, વસુંધરા તેવતિયા, અંજુમ તંવર અને શ્રિયા જોશીએ આગળના રાઉન્ડમાં સ્થાન મેળવ્યું છે.

દૃષ્ટિબાધિત વર્ગમાં ત્રણ ભારતીય સેમિફાઇનલમાં

દૃષ્ટિબાધિત વર્ગમાં ભારતના પવન કુમાર, યુગલ ગર્ગ અને તન્વી પ્રવીણ ઇંગલે સેમિફાઇનલમાં પ્રવેશ મેળવ્યો છે. આ સાથે ત્રણેય ખેલાડીઓએ મેડલની રેસમાં વધુ એક મહત્વનું પગલું ભર્યું છે.

7 સપ્ટેમ્બરે એલિમિનેશન રાઉન્ડ

હવે સ્પર્ધા નિર્ણાયક તબક્કામાં પ્રવેશી રહી છે. 7 સપ્ટેમ્બરે વ્યક્તિગત એલિમિનેશન રાઉન્ડ અને ટીમ મુકાબલા યોજાશે. ત્યારબાદ 8 અને 9 સપ્ટેમ્બરે મેડલ મુકાબલા સાથે વર્લ્ડ આર્ચરી પેરા સિરીઝ 2026નું સમાપન થશે.