Vadodara ને મળ્યું ICC નું ગૌરવ, પ્રથમ મહિલા ચેમ્પિયન્સ ટ્રોફીની મેચો અહીં રમાશે

Vadodara : ICCની સત્તાવાર જાહેરાત અનુસાર ટૂર્નામેન્ટ 14થી 28 ફેબ્રુઆરી 2027 દરમિયાન યોજાશે. ટૂર્નામેન્ટ માટે વડોદરાનું Vadodara International Cricket Stadium અને મુંબઈનું Cricket Club of India (CCI) પસંદ કરવામાં આવ્યું છે.

આ નિર્ણયથી વડોદરાને વૈશ્વિક મહિલા ક્રિકેટના નકશા પર મહત્વનું સ્થાન મળ્યું છે. ખાસ કરીને નવા આંતરરાષ્ટ્રીય સ્ટેડિયમ માટે આ એક મોટું ગૌરવ માનવામાં આવી રહ્યું છે.

વડોદરા બનશે વર્લ્ડ ક્રિકેટનું કેન્દ્ર

આ પ્રથમ ICC Women’s Champions Trophy હશે અને તેમાં વિશ્વની છ અગ્રણી મહિલા ક્રિકેટ ટીમો ભાગ લેશે. ભારત ઉપરાંત ઓસ્ટ્રેલિયા, ઇંગ્લેન્ડ, ન્યૂઝીલેન્ડ, દક્ષિણ આફ્રિકા અને શ્રીલંકા ટૂર્નામેન્ટમાં રમશે. છ ટીમો રાઉન્ડ-રોબિન લીગમાં એકબીજા સામે મુકાબલો કરશે અને ટોચની બે ટીમો 28 ફેબ્રુઆરીએ યોજાનારી ફાઈનલમાં પ્રવેશ કરશે.

ICCના જણાવ્યા અનુસાર ટૂર્નામેન્ટનું આયોજન અગાઉ શ્રીલંકામાં થવાનું હતું, પરંતુ ત્યારબાદ યજમાની ભારતને સોંપવામાં આવી છે. ભારતની પસંદગી માટે ICCએ બાંગ્લાદેશ, ભારત અને દક્ષિણ આફ્રિકાના વિકલ્પોનું યજમાન મૂલ્યાંકન માપદંડો અનુસાર મૂલ્યાંકન કર્યું હતું. ત્યારબાદ ICC બોર્ડે ભારતને રિપ્લેસમેન્ટ હોસ્ટ તરીકે મંજૂરી આપી.

વડોદરાને મળ્યું મોટું ICC ગૌરવ

વડોદરાને મળેલી આ યજમાનીથી શહેરના ક્રિકેટ પ્રેમીઓમાં ખાસ ઉત્સાહ જોવા મળી શકે છે. આંતરરાષ્ટ્રીય સ્તરની મહિલા ક્રિકેટર્સને વડોદરાના મેદાન પર રમતા જોવાની તક સ્થાનિક ચાહકો માટે ખાસ બની રહેશે.

આ ટૂર્નામેન્ટ મહિલા ક્રિકેટ માટે પણ મહત્વપૂર્ણ છે. ICCના જણાવ્યા અનુસાર આ ઇવેન્ટ વિશ્વની ટોચની મહિલા ટીમોને એક જ પ્લેટફોર્મ પર લાવશે અને મહિલા ક્રિકેટને વૈશ્વિક સ્તરે વધુ વેગ આપશે. ICC ચેરમેન જય શાહે પણ આ ટૂર્નામેન્ટને મહિલા ક્રિકેટ માટે નવા અધ્યાય તરીકે ગણાવી છે. હાલમાં ICC દ્વારા મેચોની સંપૂર્ણ તારીખવાર યાદી અને ટિકિટિંગ અંગેની વિગતો બાદમાં જાહેર કરવામાં આવશે. પરંતુ એક વાત નિશ્ચિત છે કે ફેબ્રુઆરી 2027માં વડોદરા આંતરરાષ્ટ્રીય મહિલા ક્રિકેટના મોટા મંચનું સાક્ષી બનશે.

આ પણ વાંચો : Arvalli માં જંગલી ભૂંડનો આતંક, ખેડૂતોના ઊભા પાકને પહોંચાડી રહ્યાં છે ભારે નુકસાન