Womens Asia Cup: મહિલા એશિયા કપ 2026માં ભારતીય મહિલા ક્રિકેટ ટીમે શાનદાર પ્રદર્શન કરતાં થાઈલેન્ડને 94 રનથી હરાવી મોટી જીત નોંધાવી છે. દુબઈ ઈન્ટરનેશનલ ક્રિકેટ સ્ટેડિયમમાં રમાયેલી મેચમાં ભારતે પ્રથમ બેટિંગ કરીને 20 ઓવરમાં 9 વિકેટે 159 રન બનાવ્યા હતા. જવાબમાં થાઈલેન્ડની ટીમ માત્ર 65 રનમાં ઓલઆઉટ થઈ ગઈ હતી.

શેફાલી વર્માની ધમાકેદાર બેટિંગ

ભારતની ઓપનર શેફાલી વર્માએ 36 બોલમાં 8 ચોગ્ગા અને 3 છગ્ગાની મદદથી 64 રનની શાનદાર ઈનિંગ રમી હતી. તેમના આ પ્રદર્શન માટે તેમને પ્લેયર ઓફ ધ મેચ જાહેર કરવામાં આવ્યા.

નંદિની શર્માની ઘાતક બોલિંગ

ભારતની જીતમાં બોલર નંદિની શર્માનો પણ મહત્વનો ફાળો રહ્યો. નંદિનીએ 4 ઓવરમાં માત્ર 18 રન આપીને 3 વિકેટ ઝડપી હતી. મેચ બાદ શેફાલીએ નંદિનીના પ્રદર્શનના વખાણ કર્યા હતા. શેફાલીએ કહ્યું કે નંદિની જે રીતે બોલિંગ કરી રહી છે તે પ્રશંસનીય છે અને તે ખૂબ મહેનત કરે છે. નંદિનીના પ્રદર્શનથી પોતે ખૂબ ખુશ હોવાનું પણ શેફાલીએ જણાવ્યું.

ટીમમાં ખુશીનો માહોલ

પ્લેયર ઓફ ધ મેચ શેફાલીએ કહ્યું કે ટીમ માટે પોતાનું શ્રેષ્ઠ પ્રદર્શન કરવું ખૂબ સારું લાગે છે અને આ જીત બાદ ભારતીય ટીમમાં ખુશીનો માહોલ છે. તેમણે કહ્યું કે ખેલાડીઓ પરિસ્થિતિને સમજીને તે પ્રમાણે પોતાની રમત બદલવા માટે તૈયાર છે.

દીપ્તિ શર્માને 150મી T20I માટે અભિનંદન

શેફાલીએ ભારતીય ઓલરાઉન્ડર દીપ્તિ શર્માને 150મી T20 ઈન્ટરનેશનલ મેચ પૂર્ણ કરવા બદલ અભિનંદન પાઠવ્યા. તેમણે દીપ્તિની મહેનતની પ્રશંસા કરતાં કહ્યું કે તેમના માટે હજુ ઘણા વધુ મેચ આવવાના છે.

બેટિંગ અને બોલિંગ યુનિટના વખાણ

શેફાલીએ કહ્યું કે બેટિંગ યુનિટે પરિસ્થિતિ પ્રમાણે ઢળવાની જરૂર છે, જ્યારે ભારતીય બોલિંગ યુનિટે શાનદાર પ્રદર્શન કર્યું. જોકે ટીમમાં કેટલીક બાબતોમાં સુધારાની જરૂર હોવાનું પણ તેમણે સ્વીકાર્યું. થાઈલેન્ડની ટીમના પ્રદર્શન અંગે પણ શેફાલીએ ખુશી વ્યક્ત કરી અને કહ્યું કે મહિલા ક્રિકેટમાં થઈ રહેલો સુધારો જોઈને આનંદ થાય છે.

આ પણ વાંચો : Nepal Flood: 39 દેશોના 590 જેટલા વિદેશી નાગરિક હજુ લાપતા, 323થી વધુનું રેસ્ક્યૂ