IND Vs SL: ભારત-શ્રીલંકા પ્રથમ વનડેનું સ્થળ બદલાયું, વિશાખાપટ્ટનમમાં રમાશે આ મેચ

IND Vs SL: ભારત અને શ્રીલંકા વચ્ચે ડિસેમ્બર 2026માં રમાનારી વનડે સિરીઝ પહેલાં મોટો ફેરફાર કરવામાં આવ્યો છે. બંને ટીમો વચ્ચે 13 ડિસેમ્બરે રમાનારી પ્રથમ વનડે હવે દિલ્હીના બદલે વિશાખાપટ્ટનમમાં રમાશે. ભારતીય ક્રિકેટ કંટ્રોલ બોર્ડ (BCCI)એ આ ફેરફારની સત્તાવાર પુષ્ટિ કરી છે. આ પહેલા આ મેચ દિલ્હીના અરુણ જેટલી સ્ટેડિયમમાં રમાવવાની હતી.

BCCIના જણાવ્યા મુજબ દિલ્હી એન્ડ ડિસ્ટ્રિક્ટ ક્રિકેટ એસોસિએશન (DDCA)એ ખરાબ હવામાનની આશંકા અને સ્ટેડિયમમાં ચાલી રહેલા રિનોવેશનના કામને ધ્યાનમાં રાખીને મેચ અન્ય સ્થળે યોજવાની માગ કરી હતી. આ માગને ધ્યાનમાં રાખીને મેચનું સ્થળ બદલવાનો નિર્ણય લેવામાં આવ્યો છે.

અરુણ જેટલી સ્ટેડિયમમાં ચાલી રહ્યું છે રિનોવેશન

દિલ્હીના અરુણ જેટલી સ્ટેડિયમમાં પિચ અને મેદાનને વધુ સારું બનાવવા માટે રિનોવેશનનું કામ ચાલી રહ્યું છે. મેદાનની સપાટી તૈયાર કરવા માટે માટી પર રેતી પાથરવામાં આવી રહી છે. આ કામગીરી આગામી 3 મહિના સુધી ચાલવાની શક્યતા છે.

DDCAના એક અધિકારીના જણાવ્યા અનુસાર, દિલ્હીમાં વધતા પ્રદૂષણ અને સ્ટેડિયમમાં ચાલી રહેલા કામને કારણે BCCIને મેચ અન્ય સ્થળે ખસેડવા વિનંતી કરવામાં આવી હતી. અગાઉ આ મેચ અમદાવાદમાં યોજાવાની અટકળો પણ સામે આવી હતી, પરંતુ હવે વિશાખાપટ્ટનમને સત્તાવાર યજમાન સ્થળ જાહેર કરવામાં આવ્યું છે.

2024માં શ્રીલંકાએ જીતી હતી વનડે સિરીઝ

ભારત અને શ્રીલંકા વચ્ચે છેલ્લી વનડે સિરીઝ ઓગસ્ટ 2024માં રમાઈ હતી. 3 મેચની આ સિરીઝ શ્રીલંકાએ 2-0થી જીતી હતી. પ્રથમ મેચ ટાઈ રહી હતી, જ્યારે બીજી અને ત્રીજી વનડેમાં શ્રીલંકાએ જીત મેળવી હતી. હવે ભારતીય ટીમ ઘરઆંગણે આ હારનો બદલો લેવાના ઈરાદા સાથે મેદાનમાં ઉતરશે.

ભારત-શ્રીલંકા સિરીઝનું સંપૂર્ણ શેડ્યૂલ

આ પ્રવાસની શરૂઆત 13 ડિસેમ્બરે વિશાખાપટ્ટનમમાં પ્રથમ વનડે સાથે થશે. ત્યારબાદ 16 ડિસેમ્બરે બીજી વનડે બેંગલુરુમાં અને ત્રીજી વનડે અમદાવાદમાં રમાશે.

વનડે સિરીઝ બાદ 22 ડિસેમ્બરથી 3 મેચની T20 ઈન્ટરનેશનલ સિરીઝ શરૂ થશે. પ્રથમ T20 રાજકોટ, બીજી 24 ડિસેમ્બરે કટક અને ત્રીજી તથા અંતિમ મેચ 27 ડિસેમ્બરે પુણેમાં રમાશે. ત્રણેય T20 મેચ ભારતીય સમય અનુસાર સાંજે 7 વાગ્યે શરૂ થશે. આમ ભારત-શ્રીલંકા સિરીઝ પહેલાં જ પ્રથમ વનડેના સ્થળમાં ફેરફાર થતાં ક્રિકેટ ફેન્સનું ધ્યાન હવે વિશાખાપટ્ટનમ તરફ કેન્દ્રિત થયું છે.

આ પણ વાંચો: IPL 2027: ઓક્શન પહેલાં CSK અને SRH વચ્ચે મોટો ટ્રેડ, 4 ખેલાડીઓની ટીમમાં અદલાબદલી