IND Vs WI T20I સિરીઝ પહેલા અર્શદીપ સિંહની ઈજાએ વધારી ચિંતા, સંજુ સેમસનનું આપ્યું હેલ્થ અપડેટ

IND Vs WI: ભારત અને વેસ્ટ ઈન્ડિઝ વચ્ચેની 5 મેચની T20I સિરીઝ એક મહત્વપૂર્ણ વળાંક પર પહોંચી ગઈ છે. ચોથી મેચમાં 24 રનથી મળેલી હાર બાદ સિરીઝ 2-2 થી બરાબર છે. 17 ઓક્ટોબરે બેંગલુરુમાં રમાનારી અંતિમ મેચ નિર્ણાયક સાબિત થશે. પરંતુ આ મહત્વપૂર્ણ મેચ પહેલા ભારતીય ટીમ ફાસ્ટ બોલર અર્શદીપ સિંહની ફિટનેસ અંગે ચિંતિત છે. વિકેટકીપર-બેટ્સમેન સંજુ સેમસને તેની ઈજા અંગે અપડેટ આપ્યું છે અને ઝડપથી સ્વસ્થ થવાની આશા વ્યક્ત કરી છે.

બુધવારે હૈદરાબાદમાં ચોથી T20Iમાં ભારતની ઈનિંગની અંતિમ ઓવર દરમિયાન અર્શદીપ ઘાયલ થયો હતો. વેસ્ટ ઈન્ડીઝના ફાસ્ટ બોલર શમર જોસેફના બાઉન્સરથી ખભા પર વાગ્યા બાદ તે અસ્વસ્થતામાં દેખાતો હતો. તેને મેદાન પર તબીબી સહાય મળી, પરંતુ તે ચાલુ રાખી શક્યો નહીં.

સંજુ સેમસને શું કહ્યું?

મેચ પછીની પ્રેસ કોન્ફરન્સમાં, સંજુ સેમસને અર્શદીપની ઈજા અંગે વાત કરી. તેને કહ્યું કે અર્શદીપ તેના ખભા પર બરફ લગાવી રહ્યો છે. તેને આશા છે કે તે ઝડપથી સ્વસ્થ થઈ જશે. તેને ફાસ્ટ બોલ વાગ્યો હતો. પરંતુ ભારતીય ટીમે હજુ સુધી અર્શદીપની ઈજાની ગંભીરતા અંગે વિગતવાર હેલ્થ અપડેટ આપ્યું નથી. તેથી પાંચમી T20Iમાં તેની ભાગીદારી અસ્પષ્ટ છે.

સિરીઝની નિર્ણાયક મેચ પર રહેશે નજર

ચોથી T20Iમાં વેસ્ટ ઈન્ડીઝે પ્રથમ બેટિંગ કરતા 247 રન બનાવ્યા. જવાબમાં ભારત 223 રનમાં ઓલઆઉટ થઈ ગયું અને 24 રનથી હારી ગયું. આ પરિણામથી 5 મેચની સિરીઝ 2-2 થી બરાબર થઈ ગઈ. બંને ટીમ હવે શનિવારે બેંગલુરુમાં એકબીજા સામે ટકરાશે. સિરીઝ જીતવા માટે ભારત માટે આ મેચ મહત્વપૂર્ણ છે.

બોલિંગ આક્રમણ માટે અર્શદીપની ઉપલબ્ધતા મહત્વપૂર્ણ બની શકે છે. જો તે સમયસર ફિટ ન થાય, તો ટીમ મેનેજમેન્ટને તેના સ્થાને કોઈ ખેલાડીનો વિચાર કરવો પડી શકે છે. હાલમાં ભારતીય ટીમ અર્શદીપની ફિટનેસ અંગે સત્તાવાર માહિતીની રાહ જોઈ રહી છે. નિર્ણાયક મેચ પહેલા બધાની નજર તેના સ્વસ્થ થવા પર રહેશે.

આ પણ વાંચો: Ind Vs WI: શ્રેયસ ઐયરે હાર બાદ બોલર્સ પર ફોડ્યું હારનું ઠીકરું, ખરાબ બેટિંગને લઈને કહી આ વાત