Women’s Asia Cup Final Today : આજે મહિલા એશિયા કપનો મહામુકાબલો, ભારત-શ્રીલંકા વચ્ચે ફાઈનલ રમાશે

Women’s Asia Cup Final Today : દુબઈ ઈન્ટરનેશનલ ક્રિકેટ સ્ટેડિયમ ખાતે રમાનારી આ ખિતાબી ટક્કરમાં બંને ટીમો ટ્રોફી પોતાના નામે કરવા માટે મેદાનમાં ઉતરશે. ખાસ વાત એ છે કે ટૂર્નામેન્ટમાં અત્યાર સુધી બંને ટીમોનું પ્રદર્શન શાનદાર રહ્યું છે અને બંને ટીમો અપરાજિત રહીને ફાઈનલમાં પહોંચી છે.

ભારતીય મહિલા ટીમ માટે આ મુકાબલો ખાસ મહત્વનો છે. ભારત અત્યાર સુધી મહિલા એશિયા કપનો ખિતાબ સાત વખત જીતી ચૂક્યું છે અને હવે ટીમની નજર વધુ એક ટ્રોફી પોતાના નામે કરવાની રહેશે. બીજી તરફ શ્રીલંકાની ટીમ વર્તમાન ચેમ્પિયન તરીકે મેદાનમાં ઉતરશે અને પોતાના ખિતાબનો બચાવ કરવાનો પ્રયાસ કરશે.

દુબઈમાં આજે ટ્રોફી વોર

ફાઈનલમાં ભારતની નજર ખાસ કરીને ઓપનર શેફાલી વર્મા પર રહેશે. ટૂર્નામેન્ટમાં શેફાલીએ અત્યાર સુધી શાનદાર બેટિંગ કરતાં 168 રન બનાવ્યા છે અને બે અડધી સદી પણ ફટકારી છે. તે હાલ ટૂર્નામેન્ટમાં સૌથી વધુ રન બનાવનાર બેટર્સમાં ટોચ પર છે. દુબઈની ધીમી અને સ્પિન બોલિંગને મદદરૂપ થતી પિચ પર પણ શેફાલીએ પોતાની આક્રમક બેટિંગની શૈલી જાળવી રાખી છે.

ભારતીય ટીમને ફાઈનલમાં શેફાલી પાસેથી ફરી એકવાર ઝડપી અને મોટી ઇનિંગ્સની આશા રહેશે. જોકે, શ્રીલંકાની ટીમને હળવાશથી લેવી ભારત માટે મુશ્કેલ બની શકે છે. વર્તમાન ચેમ્પિયન શ્રીલંકા પણ ટૂર્નામેન્ટમાં અપરાજિત રહી છે અને ઘરઆંગણે નહીં પરંતુ દુબઈની પરિસ્થિતિમાં ભારતીય ટીમને પડકાર આપવા માટે તૈયાર છે.

ભારત-શ્રીલંકા વચ્ચે મહિલા એશિયા કપ ફાઈનલ

દુબઈની પિચ પર સ્પિન બોલરોને મદદ મળી શકે છે, જેના કારણે બંને ટીમોના સ્પિન આક્રમણની ભૂમિકા પણ મહત્વપૂર્ણ બની શકે છે. બેટર્સ માટે શરૂઆતમાં ઝડપી રન બનાવવા કરતાં પરિસ્થિતિને સમજવી અને વિકેટ બચાવીને સ્કોર આગળ વધારવો મહત્વપૂર્ણ રહેશે. એક તરફ સાત વખતની ચેમ્પિયન ભારત, તો બીજી તરફ વર્તમાન ચેમ્પિયન શ્રીલંકા બંને ટીમો વચ્ચેની આ ફાઈનલમાં રોમાંચની કોઈ કમી રહેવાની નથી. ક્રિકેટ ચાહકોની નજર હવે એ વાત પર રહેશે કે દુબઈમાં કઈ ટીમ શ્રેષ્ઠ પ્રદર્શન કરીને મહિલા એશિયા કપની ટ્રોફી પોતાના નામે કરે છે.

આ પણ વાંચો : Bhavnagar માં લઠ્ઠાકાંડ બાદ પણ ના સુધર્યા બુટલેગરો ! ફરી દારૂની મીની ફેક્ટરી ઝડપાઈ