Abishek Porel જેલમાંથી જામીન પર છૂટ્યા બાદ સદી ફટકાર્યા પછી રડી પડ્યો, વ્યક્ત કર્યું પોતાનું દુઃખ

Abishek Porel: 2026-27 રણજી ટ્રોફીમાં બંગાળનો પહેલી મેચ દિલ્હી સામે કલ્યાણીમાં રમાઈ રહી છે. બંગાળના અભિષેક પોરેલે આ મેચમાં શાનદાર બેટિંગ કરી અને સદી ફટકારી. બીજા દિવસના અંતે અભિષેક 114 રન બનાવીને અણનમ રહ્યો. સદી ફટકાર્યા બાદ અભિષેક ભાવુક થઈ ગયો અને ઉજવણી કરતી વખતે રડવા લાગ્યો. હવે અભિષેકે પોતાના અંગત જીવન અને પોતાની સદી સાથે જોડાયેલા વિવાદ વિશે વાત કરી છે.

અભિષેક પોરેલે મોટું નિવેદન આપ્યું

અભિષેક પોરેલ પર એક મહિલાએ બળાત્કારનો આરોપ લગાવ્યો હતો, જેના કારણે તેને જેલની સજા ફટકારવામાં આવી હતી. કોર્ટનો નિર્ણય હજુ બાકી હોવાથી તેને જામીન પર મુક્ત કરવામાં આવ્યો હતો. આની તેના ક્રિકેટ કરિયર પર નોંધપાત્ર અસર પડી હતી. આ જ કારણ છે કે રણજી ટ્રોફીમાં વાપસી વખતે સદી ફટકાર્યા પછી અભિષેક પોતાની લાગણીઓને કાબૂમાં રાખી શક્યો નહીં. મીડિયા સાથે વાત કરતાં તેને કહ્યું કે "મેં છેલ્લા 2 વર્ષમાં ફક્ત એક જ સદી ફટકારી હતી. તેથી જ મને લાગ્યું કે સદી મને શાંતિ આપશે. હું થોડો બેચેન હતો."

અભિષેક પોરેલે આગળ કહ્યું કે "જીવનમાં ઉતાર-ચઢાવ આવ્યા છે. હું ઘાયલ થયો છું અને કેટલાક અકસ્માતો પણ થયા છે. હું રડવા માગતો ન હતો, પણ આંસુ પોતાની મેળે બહાર નીકળી ગયા. મારી ઉજવણી એ હકીકતનો પ્રતિભાવ હતો કે હું કંઈ કહેવા માગતો નથી. હું ફક્ત ક્રિકેટ રમવા માગુ છું અને તેના દ્વારા દરેકને જવાબ આપવા માંગુ છું."

ક્રિકેટ મારા માટે બધું જ છે...

અભિષેક પોરેલે કહ્યું કે તેની સદી તેને પ્રેરણા આપશે. તેને કહ્યું કે "મેં જોયું છે કે વિવિધ પરિસ્થિતિઓમાં કેવી રીતે ટકી રહેવું. હું અહીંથી ઘણી સકારાત્મક બાબતો લઈશ. દરરોજ, દરેક મિનિટ, દરેક ક્ષણે મને શીખવ્યું છે કે મારે મારા મોંથી નહીં, મારા બેટથી જવાબ આપવો જોઈએ. હું ક્રિકેટ દ્વારા મને ઓળખતા દરેકને કહેવા માગુ છું કે ક્રિકેટ મારા માટે બધું છે."

અભિષેક પોરેલ પર શું આરોપ છે?

કર્ણાટકની એક મહિલા મેડિકલ સ્ટુડન્ટે અભિષેક પોરેલ વિરુદ્ધ પોલીસ કેસ દાખલ કર્યો. મહિલાએ દાવો કર્યો હતો કે તે અને અભિષેક સાડા ત્રણ વર્ષથી સાથે હતા અને લગ્ન કરવાની યોજના બનાવી હતી. તેણે આરોપ લગાવ્યો હતો કે બંગાળના વિકેટકીપર-બેટ્સમેને તેની સાથે લગ્ન કરવાની ના પાડી હતી. અભિષેક પર બળાત્કાર અને ધમકીઓનો આરોપ હતો. ત્યારબાદ પોલીસે તપાસ શરૂ કરી અને જુલાઈ 2026 માં કોલકાતા હાઈકોર્ટે અભિષેકની ધરપકડનો આદેશ આપ્યો. બાદમાં તેને જામીન પર મુક્ત કરવામાં આવ્યો, અને આ ગંભીર આરોપો પર કોર્ટનો નિર્ણય હજુ પણ બાકી છે.

આ પણ વાંચો: KL Rahul: ટીમ ઈન્ડિયાનું કેએલ રાહુલને લઈને વધ્યું ટેન્શન, ન્યુઝીલેન્ડ ટેસ્ટ સિરીઝ પહેલા ન બન્યા કોઈ રન