Nepal Flood: નેપાળમાં અચાનક આવેલા પૂર અને નદીઓના વધતા જળસ્તરને પગલે બિહારમાં તંત્ર એલર્ટ મોડમાં આવી ગયું છે. નેપાળ-ચીન સરહદ નજીકથી અચાનક પાણીનો પ્રવાહ વધતા ભારત-નેપાળ સરહદને અડીને આવેલા વિસ્તારોમાં સાવચેતી વધારવામાં આવી છે. ખાસ કરીને ગંડક અને કોસી નદીના જળસ્તર પર સતત નજર રાખવા અધિકારીઓને સૂચના આપવામાં આવી છે. નેપાળમાં સર્જાયેલી પરિસ્થિતિની અસર બિહારની નદીઓ પર પડી શકે તેવી આશંકાને પગલે સંવેદનશીલ અને નીચાણવાળા વિસ્તારોમાં તંત્રને સતર્ક રહેવા સૂચના આપવામાં આવી છે. સંભવિત પૂર સામે સમયસર બચાવ અને રાહત કામગીરી શરૂ કરી શકાય તે માટે તૈયારીઓ પણ કરવામાં આવી રહી છે.

નેપાળમાં પૂરની તબાહી, 16નાં મોત; 105 ભારતીયો સહિત 400 વિદેશી નાગરિકો લાપતા

નેપાળમાં આવેલા ભયાનક પૂરના કારણે અત્યાર સુધીમાં 16 લોકોનાં મોત અને 36 લોકો ઈજાગ્રસ્ત થયાના અહેવાલ છે. પૂર બાદ નેપાળમાં આશરે 400 વિદેશી નાગરિકો લાપતા હોવાની માહિતી સામે આવી છે, જેમાં 105 ભારતીય નાગરિકોનો પણ સમાવેશ થાય છે. પૂરગ્રસ્ત વિસ્તારોમાં રાહત અને બચાવ કામગીરી સતત ચાલી રહી છે. પ્રશાસનની ટીમો લોકોને સુરક્ષિત સ્થળોએ ખસેડી રહી છે, જ્યારે લાપતા લોકોની શોધખોળ માટે મોટા પાયે રેસ્ક્યૂ ઓપરેશન હાથ ધરાયું છે.

https://twitter.com/askrajeshsahu/status/2092527999874928824

ત્રિશૂલી નદીમાં અચાનક વધ્યો પાણીનો પ્રવાહ

નેપાળના ફુર્કે ખોલા વિસ્તારમાં ત્રિશૂલી નદીના જળસ્તરમાં અચાનક વધારો નોંધાયો છે. આ વિસ્તાર ભારત-નેપાળ સરહદથી આશરે 160 કિલોમીટર દૂર હોવાનું જણાવવામાં આવી રહ્યું છે. પ્રાથમિક માહિતી મુજબ, નેપાળ-ચીન સરહદ નજીક સંભવિત ગ્લેશિયલ લેક આઉટબર્સ્ટ ફ્લડ (GLOF)ની અસરને કારણે નદીમાં અચાનક પાણી વધ્યું હોવાની આશંકા છે. આ પાણીનો પ્રવાહ નીચેની તરફ વધીને ગંડક નદીમાં પહોંચી શકે છે. જોકે, રસ્તામાં પાણીના પ્રવાહની તીવ્રતા ઘટવાની શક્યતા વ્યક્ત કરવામાં આવી રહી છે. તેમ છતાં બિહારના નીચાણવાળા અને સરહદી વિસ્તારોમાં પૂરનું જોખમ ધ્યાનમાં રાખીને તંત્ર દ્વારા સતત દેખરેખ રાખવામાં આવી રહી છે.

https://twitter.com/Sachingupta/status/2092555784806699402

ગંડક બેરેજના ગેટને લઈને ખાસ સૂચના

પૂરની સંભાવનાને ધ્યાનમાં રાખીને ગંડક બેરેજના ગેટનું સંચાલન જરૂરી મુજબ કરવાની સૂચના આપવામાં આવી છે. અચાનક વધેલા પાણીના દબાણને નિયંત્રિત કરી વધારાનું પાણી સુરક્ષિત રીતે આગળ પસાર થાય અને ડાઉનસ્ટ્રીમ વિસ્તારોમાં જોખમ ઓછું થાય તે માટે તંત્રને તૈયાર રહેવા જણાવાયું છે. નેપાળમાં ભારે વરસાદ અથવા અચાનક પૂર જેવી સ્થિતિ સર્જાય ત્યારે તેની સીધી અસર બિહારની નદીઓ પર પડી શકે છે. ગંડક અને કોસી સહિતની અનેક નદીઓના જળગ્રહણ વિસ્તારો નેપાળમાં આવેલા હોવાથી નેપાળમાં પાણી વધે ત્યારે બિહારના નીચાણવાળા વિસ્તારોમાં પણ જળસ્તર વધવાની શક્યતા રહે છે.

https://twitter.com/RShivshankar/status/2092510532838551891

ગંડક અને કોસી બેસિનના જિલ્લાઓ પર ખાસ નજર

નેપાળમાં ફ્લેશ ફ્લડના જોખમને ધ્યાનમાં રાખીને બિહારમાં ગંડક અને કોસી નદી બેસિન સાથે જોડાયેલા જિલ્લાઓમાં ખાસ તકેદારી રાખવામાં આવી રહી છે. ગંડક બેસિનમાં પશ્ચિમ ચંપારણ, પૂર્વી ચંપારણ, ગોપાલગંજ, સારણ અને વૈશાલી જેવા વિસ્તારોમાં નજર રાખવામાં આવી રહી છે. જ્યારે કોસી બેસિન સાથે જોડાયેલા સુપૌલ, મધેપુરા અને અરરિયા જેવા વિસ્તારોમાં પણ નીચાણવાળા વિસ્તારો અને સંવેદનશીલ સ્થળોની સ્થિતિ પર નજર રાખવામાં આવી રહી છે. અધિકારીઓને તટબંધો, નદીના જળસ્તર અને સંભવિત જળભરાવવાળા વિસ્તારોની સતત દેખરેખ રાખવા સૂચના આપવામાં આવી છે.

https://twitter.com/Sachingupta/status/2092560241410134254

બિહારમાં પહેલેથી જ અનેક નદીઓનું જળસ્તર ચિંતાજનક

બિહારમાં પહેલેથી જ કેટલીક નદીઓના વધતા જળસ્તરને કારણે ચિંતા જોવા મળી રહી છે. 23 ઓગસ્ટના સત્તાવાર ફ્લડ ફોરકાસ્ટના આંકડા અનુસાર કોસી, ગંડક અને ગંગા સહિતની કેટલીક નદીઓના વિવિધ ગેજ સ્ટેશનો પર પાણીનું સ્તર ચેતવણી અથવા જોખમના નિશાનની આસપાસ કે તેની ઉપર નોંધાયું હતું. આવી સ્થિતિમાં નેપાળ તરફથી આવતું વધારાનું પાણી બિહાર માટે પડકાર વધારી શકે છે. તેથી સ્થાનિક તંત્રને સતત મોનિટરિંગ અને જરૂરિયાત મુજબ તાત્કાલિક પગલાં લેવા સૂચના આપવામાં આવી છે.

https://twitter.com/RT_India_news/status/2092487714935541873

SSBની 11 રેસ્ક્યૂ ટીમો એલર્ટ

નેપાળમાં અચાનક આવેલા ફ્લેશ ફ્લડ બાદ ભારત-નેપાળ સરહદ પર તૈનાત સશસ્ત્ર સીમા દળ (SSB) દ્વારા પણ બચાવ કામગીરી માટે તૈયારીઓ વધારવામાં આવી છે. SSBએ રાહત અને બચાવ કામગીરી માટે 11 રેસ્ક્યૂ એન્ડ રિલીફ ટીમોને એલર્ટ કરી છે, જ્યારે વધુ 7 ટીમોને સ્ટેન્ડબાય પર રાખવામાં આવી છે. સરહદી બટાલિયનોને પરિસ્થિતિ પર સતત નજર રાખવા અને સ્થાનિક વહીવટી તંત્ર સાથે સંપર્કમાં રહેવા સૂચના આપવામાં આવી છે. જરૂરિયાત ઊભી થાય તો SSBની ટીમો રાજ્ય સરકાર અને સ્થાનિક તંત્ર સાથે મળીને રેસ્ક્યૂ, રાહત અને ઇમરજન્સી કામગીરીમાં મદદ કરશે.

https://twitter.com/MeghUpdates/status/2092525537403269261

નેપાળના રસુવામાં ભીષણ પૂરથી ભારે નુકસાન

બીજી તરફ નેપાળના રસુવા જિલ્લામાં બુધવારે સવારે અચાનક આવેલા પૂરે ભારે તબાહી મચાવી છે. તિબેટ તરફથી આવેલા ભારે પાણીના પ્રવાહને કારણે ભોટેકોશી નદીનું જળસ્તર અચાનક વધી ગયું હતું. ટિમુરે બજાર અને આસપાસના વિસ્તારોમાં પૂરનું પાણી ઝડપથી ફરી વળતાં અનેક મકાનો, વાહનો અને અન્ય સંપત્તિને નુકસાન થયું હોવાનું સામે આવ્યું છે. રસ્તાઓ અને પુલોને પણ ભારે નુકસાન પહોંચ્યું છે. રસુવાના ચીફ ડિસ્ટ્રિક્ટ ઓફિસર નરેન્દ્ર પરિયારના જણાવ્યા અનુસાર, બુધવારે સવારે આશરે 9:15 વાગ્યે તિબેટ તરફથી ભોટેકોશી નદીમાં અચાનક મોટી માત્રામાં પાણી આવવાની માહિતી મળી હતી. ત્યારબાદ ટિમુરે અને આસપાસના વિસ્તારોમાં સ્થિતિ ઝડપથી વણસી હતી.

https://twitter.com/iNikhilsaini/status/2092558888751284687

રાહત અને બચાવ કામગીરી ચાલુ

નેપાળની સેના અને સુરક્ષા દળો દ્વારા અસરગ્રસ્ત વિસ્તારોમાં રાહત અને બચાવ કામગીરી હાથ ધરવામાં આવી છે. જરૂરિયાત મુજબ હેલિકોપ્ટરની મદદ પણ લેવામાં આવી રહી છે. બેટ્રાવતીથી રસુવાગઢી બોર્ડર સુધીના આશરે 42 કિલોમીટર રસ્તાને અનેક સ્થળોએ નુકસાન થયું હોવાની માહિતી છે. કેટલાક કોંક્રિટ પુલ પણ ધોવાઈ ગયા હોવાનું સામે આવ્યું છે. કેટલાક અહેવાલોમાં મોટી સંખ્યામાં લોકો તણાઈ ગયા હોવાના દાવા કરવામાં આવ્યા છે, જોકે આશરે 1,000 લોકો તણાઈ ગયા હોવાના દાવાની હજુ સત્તાવાર પુષ્ટિ થઈ નથી. હાલ રાહત અને બચાવ કામગીરી ચાલુ છે અને સમગ્ર નુકસાનનું આકલન કરવામાં આવી રહ્યું છે. નેપાળમાં સર્જાયેલી આ ગંભીર પૂર જેવી સ્થિતિ વચ્ચે હવે બિહારના ગંડક, કોસી અને ગંગા નદી વિસ્તાર પર તંત્રની નજર વધુ કડક બની છે. નેપાળમાંથી આવતી દરેક નવી માહિતીના આધારે બિહારમાં જરૂરી પગલાં લેવામાં આવી રહ્યા છે.