India Russia Trade: ભારત અને રશિયા વચ્ચેના દ્વિપક્ષીય સંબંધોને લઈને રશિયાના રાષ્ટ્રપતિ વ્લાદિમીર પુતિને વડાપ્રધાન નરેન્દ્ર મોદીની પ્રશંસા કરી છે. પુતિને ભારત-રશિયા વચ્ચે આ વર્ષે વેપારમાં થયેલા વધારા માટે વડાપ્રધાન મોદીના બંને દેશોના સંબંધો પર રહેલા વ્યક્તિગત ધ્યાનને મહત્વનું કારણ ગણાવ્યું છે. મોસ્કોમાં વિદેશ મંત્રી એસ. જયશંકર સાથેની મુલાકાત દરમિયાન પુતિને ભારત અને રશિયા વચ્ચેના સંબંધોની ગહનતાનો ઉલ્લેખ કર્યો હતો. તેમણે વડાપ્રધાન મોદી સાથે ટૂંક સમયમાં મુલાકાત થવાની આશા પણ વ્યક્ત કરી હતી.

https://twitter.com/sidhant/status/2091847088686739826

ભારત-રશિયા વેપાર વધ્યો, પુતિને મોદીને આપ્યું શ્રેય

પુતિને જણાવ્યું કે ગયા વર્ષે ભારત અને રશિયા વચ્ચેના વેપારમાં થોડો ઘટાડો નોંધાયો હતો, પરંતુ આ વર્ષે બંને દેશો વચ્ચે વેપારમાં વધારો થઈ રહ્યો છે. તેમણે આ વધારા પાછળ વડાપ્રધાન મોદીના યોગદાનને મહત્વપૂર્ણ ગણાવ્યું. પુતિના જણાવ્યા અનુસાર, વડાપ્રધાન મોદી ભારત-રશિયા સંબંધોના વિકાસ પર વ્યક્તિગત રીતે ધ્યાન આપી રહ્યા છે, જેના કારણે બંને દેશો વચ્ચેના સહયોગને વધુ ગતિ મળી રહી છે.

https://twitter.com/ANI/status/2091848880560455710

SCO સમિટમાં મોદી-પુતિની મુલાકાતની શક્યતા

રશિયન રાષ્ટ્રપતિએ વિદેશ મંત્રી એસ. જયશંકર મારફતે વડાપ્રધાન મોદીને શુભેચ્છા પાઠવી હતી. સાથે જ તેમણે ટૂંક સમયમાં વડાપ્રધાન મોદી સાથે મુલાકાત થવાની આશા વ્યક્ત કરી હતી. પુતિના જણાવ્યા અનુસાર, બંને નેતાઓની આગામી મુલાકાત શાંઘાઈ કોઓપરેશન ઓર્ગેનાઈઝેશન (SCO) શિખર સંમેલન દરમિયાન થઈ શકે છે. આ ઉપરાંત આ વર્ષે બંને નેતાઓ વચ્ચે વધુ એક મુલાકાતની શક્યતા પણ તેમણે વ્યક્ત કરી હતી.

ઊર્જા અને ખાતરની સપ્લાય પર ખાસ ચર્ચા

ભારત અને રશિયા વચ્ચે ઊર્જા ઉપરાંત ખાતરની સપ્લાય પણ મહત્વનો સહયોગ ક્ષેત્ર બની રહ્યો છે. પુતિને જણાવ્યું કે રશિયા ભારતીય ખેડૂતો અને કૃષિ ક્ષેત્રની જરૂરિયાતોને ધ્યાનમાં રાખીને ખાતરની સપ્લાય વધારી રહ્યું છે. તેમણે કહ્યું કે ભવિષ્યમાં પણ ભારતને ખાતરની સપ્લાય વધારવા માટે રશિયા તૈયાર છે. બંને દેશો વચ્ચે ઊર્જા ક્ષેત્રે પણ સહયોગ સતત આગળ વધી રહ્યો છે.

ન્યુક્લિયર એનર્જી અને હાઈટેક ક્ષેત્રે પણ સહયોગ

ભારત અને રશિયા વચ્ચેનો સહયોગ માત્ર વેપાર અને ઊર્જા પૂરતો મર્યાદિત નથી. બંને દેશો પરમાણુ ઊર્જા અને હાઈટેક ક્ષેત્ર સહિત અનેક મહત્વપૂર્ણ ક્ષેત્રોમાં સાથે મળીને કામ કરી રહ્યા છે. પુતિને ભારત અને રશિયા વચ્ચે સરકાર, સંસદ તથા આર્થિક ક્ષેત્ર સહિત વિવિધ સ્તરે સહયોગ આગળ વધી રહ્યો હોવાનું જણાવ્યું હતું.

ભારત-રશિયા સંબંધો વધુ મજબૂત બનવાની દિશામાં

વિદેશ મંત્રી એસ. જયશંકરની રશિયા મુલાકાત એવા સમયે થઈ રહી છે જ્યારે બંને દેશો પોતાની લાંબા સમયથી ચાલતી વ્યૂહાત્મક ભાગીદારીને વધુ મજબૂત બનાવવાની દિશામાં આગળ વધી રહ્યા છે. વેપાર, ઊર્જા, ખાતર, પરમાણુ ઊર્જા અને હાઈટેક ક્ષેત્ર ભારત-રશિયા સહયોગના મહત્વના આધારસ્તંભ બની રહ્યા છે. પુતિન દ્વારા વડાપ્રધાન મોદીના વ્યક્તિગત યોગદાનની પ્રશંસા બંને દેશોના વધતા સહયોગ વચ્ચે મહત્વપૂર્ણ સંદેશ તરીકે જોવામાં આવી રહી છે.