BRICSના સંસદીય મંચે પહેલગામ આતંકી હુમલાની કરી કડક નિંદા, સરહદ પારના આતંકવાદ સામે સંયુક્ત લડતનું આહ્વાન

BRICS: બ્રિક્સના સભ્ય દેશોએ જમ્મુ-કાશ્મીરમાં 22 એપ્રિલ, 2025ના રોજ થયેલા પહેલગામ આતંકવાદી હુમલાની ફરી એકવાર કડક શબ્દોમાં નિંદા કરી છે. નવી દિલ્હીમાં યોજાયેલા 12મા બ્રિક્સ સંસદીય મંચના સમાપન પ્રસંગે જાહેર કરાયેલી સંયુક્ત ઘોષણામાં સભ્ય દેશોએ સરહદ પારના આતંકવાદ, આતંકવાદને મળતી આર્થિક સહાય અને આતંકવાદીઓને સુરક્ષિત આશ્રય આપનારાઓ સામે સંયુક્ત કાર્યવાહી કરવાની પ્રતિબદ્ધતા વ્યક્ત કરી હતી.

આ હુમલામાં 26 લોકોનાં મોત થયાં હતાં અને અનેક લોકો ઘાયલ થયા હતા. બ્રિક્સના પ્રતિનિધિઓએ આતંકવાદ સામે ઝીરો ટોલરન્સ પોલિસી અપનાવવા અને આતંકવાદનો સામનો કરવામાં બેવડા ધોરણો ન રાખવા પર ભાર મૂક્યો હતો.

આતંકવાદના તમામ સ્વરૂપો સામે લડવાનો સંકલ્પ

સંયુક્ત ઘોષણામાં જણાવાયું હતું કે આતંકવાદનું કોઈપણ કૃત્ય ગુનાહિત અને અયોગ્ય છે. આતંકવાદી પ્રવૃત્તિઓ પાછળનું કારણ ગમે તે હોય, તેને કોઈપણ સંજોગોમાં સ્વીકારી શકાય નહીં.

બ્રિક્સના સભ્ય દેશોએ સ્પષ્ટ કર્યું કે આતંકવાદને કોઈ ધર્મ, રાષ્ટ્રીયતા, સભ્યતા કે વંશીય સમુદાય સાથે જોડવો જોઈએ નહીં. આતંકવાદી પ્રવૃત્તિઓમાં સામેલ વ્યક્તિઓ અને તેમને મદદ કરનારાઓને જવાબદાર ઠેરવીને સંબંધિત રાષ્ટ્રીય તથા આંતરરાષ્ટ્રીય કાયદા અનુસાર ન્યાયના કઠેડામાં લાવવા જોઈએ.

આતંકવાદ વિરોધી સહયોગ વધુ મજબૂત બનાવાશે

બ્રિક્સના પ્રતિનિધિઓએ બ્રિક્સ આતંકવાદ વિરોધી કાર્યકારી જૂથ અને તેના પાંચ પેટાજૂથોની કામગીરીને આવકારી હતી. આ જૂથો આતંકવાદ સામેની વ્યૂહરચના અને કાર્યયોજનાના આધારે સહયોગ વધારે મજબૂત બનાવવા માટે કામ કરે છે.

સભ્ય દેશોએ સંયુક્ત રાષ્ટ્રના માળખા હેઠળ આંતરરાષ્ટ્રીય આતંકવાદ અંગેના વ્યાપક સંમેલનને વહેલી તકે અંતિમ સ્વરૂપ આપીને અપનાવવાની પણ અપીલ કરી હતી. સંયુક્ત રાષ્ટ્ર દ્વારા નિયુક્ત આતંકવાદીઓ અને આતંકવાદી સંગઠનો સામે સાથે મળીને કાર્યવાહી કરવાની જરૂરિયાત પર પણ ભાર મૂકવામાં આવ્યો હતો.

પશ્ચિમ એશિયાના તણાવ અંગે ચિંતા

બ્રિક્સ સંસદીય મંચે પશ્ચિમ એશિયામાં વધી રહેલા તણાવ અંગે ઊંડી ચિંતા વ્યક્ત કરી હતી. તમામ પક્ષોને મહત્તમ સંયમ જાળવવા અને પરિસ્થિતિ વધુ વણસે તેવાં પગલાંથી દૂર રહેવાની અપીલ કરવામાં આવી હતી.

ઘોષણામાં નાગરિકો અને નાગરિક માળખાની સુરક્ષા, દેશોની સાર્વભૌમત્વ તથા પ્રાદેશિક અખંડિતતાનું સન્માન કરવા પર ભાર મૂકવામાં આવ્યો હતો. આ સાથે જ સંવાદ અને રાજદ્વારી પ્રયાસો દ્વારા કાયમી શાંતિ અને સ્થિરતા સ્થાપિત કરવાની જરૂરિયાત દર્શાવવામાં આવી હતી.

એકતરફી આર્થિક પ્રતિબંધોનો પણ વિરોધ

સંયુક્ત ઘોષણામાં આંતરરાષ્ટ્રીય કાયદાની વિરુદ્ધ લાદવામાં આવતા એકતરફી આર્થિક અને દ્વિતીયક પ્રતિબંધોની પણ ટીકા કરવામાં આવી હતી. બ્રિક્સના સભ્ય દેશોના મતે, આવા પગલાં સંબંધિત દેશોની સામાન્ય જનતાના માનવાધિકારો, આરોગ્ય, ખાદ્ય સુરક્ષા અને વિકાસના અધિકાર પર નકારાત્મક અસર કરી શકે છે.

તમને જણાવી દઈએ કે અગાઉ નવી દિલ્હીમાં યોજાયેલા બ્રિક્સ શિખર સંમેલન દરમિયાન પણ પહેલગામ આતંકવાદી હુમલાની નિંદા કરવામાં આવી હતી. હવે 12મા બ્રિક્સ સંસદીય મંચની સંયુક્ત ઘોષણાએ આતંકવાદ સામે સહયોગ વધારવા અને આંતરરાષ્ટ્રીય સ્તરે સંકલિત કાર્યવાહી કરવાની પ્રતિબદ્ધતાને ફરી દોહરાવી છે.

આ પણ વાંચો: Liechtensteinના પ્રિન્સ ચાર દિવસના ભારત પ્રવાસે, 27 ઓક્ટોબરે PM મોદી સાથે કરશે મુલાકાત