Americaમાં બનેલું પહેલું 'તમીર' ઈન્ટરસેપ્ટર ઈઝરાયેલને સોંપાયું, આયર્ન ડોમ વધુ મજબૂત બનશે

America : અમેરિકામાં સંપૂર્ણ રીતે તૈયાર કરવામાં આવેલું પ્રથમ 'તમીર' ઈન્ટરસેપ્ટર ઈઝરાયેલને સોંપવામાં આવ્યું છે. 'તમીર' ઈઝરાયેલની પ્રખ્યાત આયર્ન ડોમ એર અને મિસાઈલ ડિફેન્સ સિસ્ટમમાં ઉપયોગમાં લેવાતું મહત્વનું ઈન્ટરસેપ્ટર છે. આ સાથે અમેરિકામાં આયર્ન ડોમ માટે સંપૂર્ણ ઈન્ટરસેપ્ટર બનાવવાની ક્ષમતા વિકસાવવાના ઈઝરાયેલ-અમેરિકા સંયુક્ત પ્રયાસને મહત્વપૂર્ણ સફળતા મળી છે.

રાફેલે રેથિયોન સાથે મળીને આ સંયુક્ત સાહસ શરૂ કર્યું

ઈઝરાયેલના રક્ષા મંત્રાલયના જણાવ્યા અનુસાર, આ પ્રથમ અમેરિકન બનાવટ 'તમીર' ઈન્ટરસેપ્ટરને ઈઝરાયેલ મિસાઈલ ડિફેન્સ ઓર્ગેનાઈઝેશન (IMDO)ને સોંપવામાં આવ્યું છે. આ સોંપણી અમેરિકાના અરકાન્સાસ રાજ્યના ઈસ્ટ કેમડેન સ્થિત રેથિયોન-રાફેલ એરિયા પ્રોટેક્શન સિસ્ટમ્સ (R2S)ની ફેક્ટરીમાં યોજાયેલા કાર્યક્રમ દરમિયાન કરવામાં આવી હતી. કેમડેનની આ ફેક્ટરી ખાસ કરીને આયર્ન ડોમ માટે 'તમીર' ઈન્ટરસેપ્ટરનું ઉત્પાદન કરવા માટે સ્થાપવામાં આવી છે. રાફેલે રેથિયોન સાથે મળીને આ સંયુક્ત સાહસ શરૂ કર્યું છે. ઈઝરાયેલ બહાર આ પહેલી ફેક્ટરી છે જ્યાં સંપૂર્ણ 'તમીર' ઈન્ટરસેપ્ટરનું ઉત્પાદન કરવામાં આવી રહ્યું છે.

ડિફેન્સ ઈન્ડસ્ટ્રીયલ બેઝને મજબૂત કરવામાં પણ મદદ કરશે

ઈઝરાયેલના રક્ષા મંત્રાલયે જણાવ્યું કે આ ફેક્ટરી બંને દેશો વચ્ચેની વ્યૂહાત્મક મિસાઈલ ડિફેન્સ ભાગીદારીને વધુ મજબૂત બનાવશે. સાથે જ અમેરિકામાં રોજગારી વધારવા અને તેના ડિફેન્સ ઈન્ડસ્ટ્રીયલ બેઝને મજબૂત કરવામાં પણ મદદ કરશે. IMDOના ડિરેક્ટર મોશે પટેલે કહ્યું કે આયર્ન ડોમે અનેક પ્રકારના ખતરાઓ સામે લોકોના જીવ બચાવવામાં મહત્વપૂર્ણ ભૂમિકા ભજવી છે. રાફેલના અધિકારી શ્લોમો ટોએફે જણાવ્યું કે આયર્ન ડોમ અત્યાર સુધીમાં 10,000થી વધુ સફળ ઈન્ટરસેપ્શન કરી ચૂક્યું છે અને આ સિદ્ધિઓના કેન્દ્રમાં 'તમીર' ઈન્ટરસેપ્ટર છે.

આ પણ વાંચો : Italy Bonus Seat Bill: PM મેલોનીએ કાયદો પાસ ન થાય તો રાજીનામાની આપી ચેતવણી