Ram Temple Donation Row : SIT બે દિવસમાં ચાર્જશીટ દાખલ કરશે, 105 ચોરીની ઘટનાઓ સામે આવી

Ram Temple Donation Row : અયોધ્યાના શ્રી રામ જન્મભૂમિ મંદિરના દાન અને ચઢાવામાં કથિત નાણાકીય ગેરરીતિના મામલે ઉત્તર પ્રદેશ સરકારે સોમવારે સુપ્રીમ કોર્ટમાં મહત્વપૂર્ણ માહિતી આપી છે. સરકારે જણાવ્યું કે મામલાની તપાસ કરી રહેલી સ્પેશિયલ ઈન્વેસ્ટિગેશન ટીમ એટલે કે SITએ મોટાભાગની તપાસ પૂર્ણ કરી લીધી છે અને આગામી બે દિવસમાં સક્ષમ કોર્ટમાં ચાર્જશીટ દાખલ કરવામાં આવશે.

SITએ તપાસનું મોટાભાગનું કામ પૂર્ણ કરી લીધું

મુખ્ય ન્યાયાધીશ સૂર્યકાંત, જસ્ટિસ જોયમાલ્યા બાગચી અને જસ્ટિસ વી. મોહનાની બેન્ચ આ મામલે સુનાવણી કરી રહી હતી. કેન્દ્ર અને ઉત્તર પ્રદેશ સરકાર તરફથી હાજર સોલિસિટર જનરલ તુષાર મહેતાએ કોર્ટને જણાવ્યું કે SITની સ્ટેટસ રિપોર્ટ સીલબંધ કવરમાં સુપ્રીમ કોર્ટમાં રજૂ કરવામાં આવી છે. સરકારના જણાવ્યા અનુસાર, ચાર્જશીટ દાખલ કરવાની સમયમર્યાદા 25 સપ્ટેમ્બરે પૂર્ણ થઈ રહી છે. SITએ તપાસનું મોટાભાગનું કામ પૂર્ણ કરી લીધું છે અને બાકી રહેલી ઔપચારિક પ્રક્રિયા પૂર્ણ કર્યા બાદ આગામી બે દિવસમાં ચાર્જશીટ દાખલ કરવામાં આવશે. સુપ્રીમ કોર્ટે આ માહિતી રેકોર્ડ પર લીધી અને સંબંધિત સેશન જજને કાયદા મુજબ યોગ્ય આદેશ પસાર કરવાની મંજૂરી આપી છે.

દાન ચોરી સાથે જોડાયેલી 105 ઘટનાઓ સામે આવી

સુપ્રીમ કોર્ટ સમક્ષ રજૂ કરવામાં આવેલી સ્ટેટસ રિપોર્ટમાં તપાસની કેટલીક વિગતો પણ સામે આવી છે. રિપોર્ટ અનુસાર, SITએ મંદિર પરિસરના CCTV ફૂટેજ સહિત અન્ય પુરાવાઓનું વિશ્લેષણ કર્યું છે. CCTV ફૂટેજના વિશ્લેષણ દરમિયાન મંદિરના દાનની ચોરી સાથે જોડાયેલી 105 ઘટનાઓ સામે આવી હોવાનું જણાવાયું છે. આ ઉપરાંત દાન અને ચઢાવા સાથે જોડાયેલા રેકોર્ડની પણ તપાસ કરવામાં આવી છે. રિપોર્ટ મુજબ, ચઢાવામાં મળતી કિંમતી વસ્તુઓની રસીદો સોફ્ટવેર દ્વારા તૈયાર કરવામાં આવે છે અને આવી કિંમતી વસ્તુઓ સ્ટેટ બેન્ક ઓફ ઈન્ડિયા (SBI)ના લોકરમાં રાખવામાં આવે છે.

ચાર્જશીટ દાખલ થયા બાદ સમગ્ર મામલે કાર્યવાહી કરાશે

અગાઉ સુપ્રીમ કોર્ટે ઉત્તર પ્રદેશ સરકારને SITનું પુનર્ગઠન કરીને નિષ્પક્ષ, ઝડપી અને ગુણવત્તાયુક્ત તપાસ સુનિશ્ચિત કરવાનો નિર્દેશ આપ્યો હતો. ત્યારબાદ વરિષ્ઠ IPS અધિકારીઓ સાથે SITનું પુનર્ગઠન કરવામાં આવ્યું હતું. તેની અધ્યક્ષતા IG કિરણ એસ. કરી રહ્યા છે, જ્યારે અયોધ્યાના DIG સોમેંન વર્મા અને SSP ડૉ. ગૌરવ ગ્રોવર સભ્ય છે. હવે આગામી દિવસોમાં SIT દ્વારા ચાર્જશીટ દાખલ થયા બાદ સમગ્ર મામલે આગળની કાયદેસરની કાર્યવાહી થશે.

આ પણ વાંચો : Madhya Pradesh : કૂનો નેશનલ પાર્કમાંથી સામે આવ્યા દુઃખદ સમાચાર, નામીબિયાઈ નર ચિત્તા 'ગૌરવ'નું સારવાર દરમિયાન થયું મોત