Madhya Pradesh : કૂનો નેશનલ પાર્કમાંથી સામે આવ્યા દુઃખદ સમાચાર, નામીબિયાઈ નર ચિત્તા 'ગૌરવ'નું સારવાર દરમિયાન થયું મોત

Madhya Pradesh : મધ્યપ્રદેશના કૂનો નેશનલ પાર્કમાંથી ફરી એકવાર દુઃખદ સમાચાર સામે આવ્યા છે. 10 વર્ષથી વધુ ઉંમરના નામીબિયાઈ નર ચિત્તા'ગૌરવ'નું સોમવારે સાંજે આશરે 4 વાગ્યે સારવાર દરમિયાન મોત થયું છે. છેલ્લા નવ દિવસથી કૂનો-પાલપુરના પશુ હોસ્પિટલમાં તેની સારવાર ચાલી રહી હતી.

શરીરમાં ગંભીર ડિહાઈડ્રેશન જોવા મળ્યું

મળતી માહિતી મુજબ, 12 સપ્ટેમ્બર 2026ના રોજ ગૌરવ ખુલ્લા જંગલ વિસ્તારમાં નબળી અને સુસ્ત હાલતમાં મળી આવ્યો હતો. ત્યારબાદ વન વિભાગની ટીમે તેને રેસ્ક્યૂ કરીને ક્વોરન્ટાઈન વોર્ડમાં ખસેડ્યો હતો. પ્રાથમિક તપાસ દરમિયાન ગૌરવ ખૂબ જ નબળો હોવાનું સામે આવ્યું હતું. તેની માંસપેશીઓ નબળી પડી ગઈ હતી અને શરીરમાં ગંભીર ડિહાઈડ્રેશન એટલે કે પાણીની ભારે ઉણપ જોવા મળી હતી.

ગૌરવને કોઈ જૂની બીમારી હોવાની આશંકા વ્યક્ત કરાઈ હતી

ગૌરવને તાત્કાલિક જરૂરી સારવાર અને સપોર્ટ આપવામાં આવ્યો હતો. ત્યારબાદ તેને પાલપુર લઈ જઈ ક્વોરન્ટાઈન બોમા (QB)માં રાખવામાં આવ્યો હતો. ત્યાં તેની સતત દેખરેખ રાખવામાં આવી રહી હતી અને નિષ્ણાતોની દેખરેખ હેઠળ સારવાર ચાલી રહી હતી. પ્રાથમિક ક્લિનિકલ તપાસના આધારે ગૌરવને કોઈ જૂની બીમારી હોવાની આશંકા વ્યક્ત કરવામાં આવી હતી. સતત સારવાર અને જરૂરી સપોર્ટ આપવા છતાં તેની સ્થિતિમાં સુધારો થયો નહોતો. અંતે સોમવારે સાંજે તેણે દમ તોડી દીધો.

ભારતમાં હવે કુલ 55 ચિત્તા

વન વિભાગના જણાવ્યા અનુસાર, ગૌરવના મોતનું ચોક્કસ કારણ પોસ્ટમોર્ટમ અને લેવામાં આવેલા સેમ્પલની તપાસ બાદ જ સ્પષ્ટ થશે. તપાસ રિપોર્ટ આવ્યા બાદ મૃત્યુ પાછળનું કારણ અંગે વધુ માહિતી સામે આવી શકે છે. ગૌરવના મોત બાદ કૂનો નેશનલ પાર્કમાં હવે 51 ચિત્તા બચ્યા છે. તેમાં 36 ભારતમાં જન્મેલા ચિત્તાઓનો સમાવેશ થાય છે. કૂનોમાં હાજર ચિત્તાઓમાંથી 16 હાલમાં ખુલ્લા જંગલમાં સ્વતંત્ર રીતે ફરી રહ્યા છે. આ ઉપરાંત મધ્યપ્રદેશના ગાંધી સાગર અભયારણ્યમાં ચાર ચિત્તા હાજર છે. કૂનો નેશનલ પાર્ક અને ગાંધી સાગર અભયારણ્યના ચિત્તાઓને મળીને ભારતમાં હવે કુલ 55 ચિત્તા હોવાનું જણાવાયું છે. ગૌરવના મોતથી દેશમાં ચાલી રહેલા ચિત્તા સંરક્ષણ અને પુનઃસ્થાપન કાર્યક્રમ અંગે ફરી ચર્ચા શરૂ થઈ છે.

આ પણ વાંચો : Uttrakhand : પિથોરાગઢમાં ભારત-મંગોલિયા સંયુક્ત સૈન્ય અભ્યાસ 'નોમેડિક એલિફન્ટ 2026' શરૂ