પેરિસ સ્પેસ સમિટમાં PM મોદીએ દુનિયાને આપ્યું આમંત્રણ, ભારતના આગામી સ્પેસ મિશનમાં ભાગીદાર બનવા અપીલ

PM Modi Paris Space Summit 2026: વડાપ્રધાન નરેન્દ્ર મોદીએ ગુરુવારે પેરિસમાં યોજાયેલા પ્રથમ આંતરરાષ્ટ્રીય સ્પેસ સમિટને વીડિયો કોન્ફરન્સિંગ દ્વારા સંબોધિત કર્યો હતો. આ દરમિયાન તેમણે ફ્રાન્સ સહિત વિશ્વભરના દેશોને ભારતના આગામી અવકાશ અભિયાનોમાં ભાગીદાર બનવા આમંત્રણ આપ્યું હતું. PM મોદીએ કહ્યું કે ભારતનો અવકાશ કાર્યક્રમ માત્ર દેશની સિદ્ધિઓ સુધી મર્યાદિત નથી, પરંતુ તેનો ઉદ્દેશ્ય અવકાશ ટેક્નોલોજીના લાભો સમગ્ર માનવજાત સુધી પહોંચાડવાનો છે.

‘વસુધૈવ કુટુંબકમ’ની ભાવના સાથે અવકાશ ક્ષેત્રમાં સહયોગ

વડાપ્રધાને ભારતના અવકાશ ક્ષેત્રના અભિગમને ‘વસુધૈવ કુટુંબકમ’ એટલે કે એક પૃથ્વી, એક પરિવાર અને એક ભવિષ્યની ભાવના સાથે જોડ્યો હતો. તેમણે સુરક્ષિત, શાંતિપૂર્ણ અને ટકાઉ અવકાશ વ્યવસ્થા માટે આંતરરાષ્ટ્રીય કાયદા, સંવાદ અને બહુપક્ષીય સહયોગ પર ભાર મૂક્યો હતો. ભવિષ્યનું અવકાશ ક્ષેત્ર સંઘર્ષને બદલે સહયોગ, ટૂંકાગાળાના લાભને બદલે સ્થિરતા અને બહિષ્કારને બદલે સમાવેશિતાના સિદ્ધાંતો પર આગળ વધવું જોઈએ તેમ તેમણે જણાવ્યું હતું.

ઈસરોની વૈશ્વિક સિદ્ધિઓનો ઉલ્લેખ

PM મોદીએ ભારતીય અંતરિક્ષ સંશોધન સંસ્થા (ISRO)ની સિદ્ધિઓનો ઉલ્લેખ કરતાં કહ્યું હતું કે ઈસરોએ ઓછા ખર્ચે અસરકારક અને વિશ્વસનીય અવકાશ મિશન હાથ ધરીને વૈશ્વિક ઓળખ બનાવી છે. અવકાશ ટેક્નોલોજીનો ઉપયોગ ખેડૂતો, માછીમારો, હવામાનની આગાહી, આપત્તિ વ્યવસ્થાપન અને નેવિગેશન સહિતના ક્ષેત્રોમાં થઈ રહ્યો છે. વડાપ્રધાનના જણાવ્યા મુજબ, અત્યાર સુધીમાં 34 દેશોના 430થી વધુ ઉપગ્રહો ભારતીય પ્રક્ષેપણ યાનો દ્વારા અવકાશમાં મોકલવામાં આવ્યા છે. તેમણે આ સિદ્ધિનો શ્રેય ઈસરોના વૈજ્ઞાનિકો, એન્જિનિયરો અને ટેક્નિકલ નિષ્ણાતોને આપ્યો હતો.

ચંદ્રયાન-3 અને આદિત્ય-L1નો ઉલ્લેખ

PM મોદીએ ભારતના તાજેતરના અવકાશ મિશનનો પણ ઉલ્લેખ કર્યો હતો. તેમણે જણાવ્યું કે ચંદ્રયાન-3એ ચંદ્રના દક્ષિણ ધ્રુવ નજીક સફળ સોફ્ટ લેન્ડિંગ કરીને ઇતિહાસ રચ્યો છે. આ ઉપરાંત આદિત્ય-L1 મિશન સૂર્યના અભ્યાસ સાથે સંબંધિત મહત્વપૂર્ણ માહિતી મેળવવામાં મહત્વપૂર્ણ ભૂમિકા ભજવી રહ્યું હોવાનું તેમણે જણાવ્યું હતું.

2035 સુધી સ્પેસ સ્ટેશન, 2040 સુધી ચંદ્ર પર ભારતીય અવકાશયાત્રી

વડાપ્રધાને ભારતની ભવિષ્યની અવકાશ યોજનાઓ અંગે પણ વાત કરી હતી. ભારત 2035 સુધી પોતાનું સ્પેસ સ્ટેશન સ્થાપિત કરવા અને 2040 સુધી ભારતીય અવકાશયાત્રીને ચંદ્ર પર મોકલવાના લક્ષ્ય સાથે આગળ વધી રહ્યું હોવાનું તેમણે જણાવ્યું હતું. PM મોદીએ આ લક્ષ્યોને માત્ર ભારતની સિદ્ધિ નહીં પરંતુ વૈશ્વિક ભાગીદારી અને વૈજ્ઞાનિક સહયોગ દ્વારા માનવજાતની સામૂહિક પ્રગતિ સાથે જોડ્યા હતા.

ભારતના સ્પેસ સ્ટાર્ટઅપ્સ પણ ઝડપથી આગળ વધી રહ્યા છે

PM મોદીએ ઈસરોની સાથે ભારતના ખાનગી અવકાશ ક્ષેત્રની વધતી ભૂમિકાનો પણ ઉલ્લેખ કર્યો હતો. દેશમાં મોટી સંખ્યામાં સ્પેસ સ્ટાર્ટઅપ્સ અને ખાનગી કંપનીઓ ઉભરી રહી છે, જે ભારતની અવકાશ અર્થવ્યવસ્થાને નવી દિશા આપી રહી છે. તેમણે કહ્યું કે ઈસરોની શ્રેષ્ઠતા સાથે ઉદ્યોગસાહસિકતાની ઊર્જા જોડાઈ રહી છે અને ભારતનું ખાનગી અવકાશ ક્ષેત્ર ઝડપથી વિસ્તરી રહ્યું છે.

ફ્રાન્સ સાથે અવકાશ ક્ષેત્રમાં લાંબો સહયોગ

ભારત અને ફ્રાન્સ વચ્ચેના લાંબા સમયથી ચાલતા અવકાશ સહયોગનો ઉલ્લેખ કરતાં PM મોદીએ કહ્યું કે બંને દેશો વચ્ચેની ભાગીદારી 1960ના દાયકામાં ભારતના અવકાશ કાર્યક્રમના પ્રારંભિક સમયથી ચાલી રહી છે. હાલમાં આ સહયોગ પૃથ્વી અવલોકન, ઉપગ્રહ ટેક્નોલોજી અને અદ્યતન અવકાશ સંશોધન સહિત અનેક ક્ષેત્રોમાં વિસ્તર્યો છે. PM મોદીએ ફ્રાન્સ સહિત અન્ય દેશોને પણ ભારતના આગામી અવકાશ મિશન અને સંશોધન સાથે ભાગીદાર બનવા આમંત્રણ આપ્યું હતું.