Nomadic Elephant 2026: ઉત્તરાખંડના પહાડોમાં ગુંજ્યું ભારત-મંગોલિયાનું યુદ્ધ કૌશલ્ય
Nomadic Elephant 2026
Nomadic Elephant 2026: ઉત્તરાખંડના પહાડોમાં ગુંજ્યું ભારત-મંગોલિયાનું યુદ્ધ કૌશલ્ય
Nomadic Elephant 2026
Nomadic Elephant 2026: ભારત અને મંગોલિયાની સેનાઓ વચ્ચે યોજાયેલ સંયુક્ત સૈન્ય અભ્યાસ ‘નોમેડિક એલિફન્ટ-2026’નું ઉત્તરાખંડના પિથોરાગઢમાં સફળતાપૂર્વક સમાપન થયું છે. 20 સપ્ટેમ્બરથી 3 ઓક્ટોબર સુધી ચાલેલા આ અભ્યાસમાં બંને દેશોના સૈનિકોએ આધુનિક યુદ્ધક્ષેત્રની વિવિધ પરિસ્થિતિઓમાં સંયુક્ત રીતે કામગીરી કરવાની તાલીમ મેળવી હતી. આ અભ્યાસ ‘નોમેડિક એલિફન્ટ’ શ્રેણીનો 18મો સંસ્કરણ હતો.
આધુનિક યુદ્ધ કૌશલ્ય પર ફોકસ
અભ્યાસ દરમિયાન બંને દેશોની સેનાઓએ સામરિક કામગીરી ઉપરાંત ગુપ્તચર અને સર્વેલન્સ પ્રવૃત્તિઓમાં ભાગ લીધો હતો. ડ્રોન ઓપરેશન, સાયબર સુરક્ષા અને ટેક્નિકલ ક્ષમતાઓના પ્રદર્શન પર પણ ખાસ ભાર મૂકવામાં આવ્યો હતો. આ તાલીમનો હેતુ બદલાતી યુદ્ધ પરિસ્થિતિમાં ઝડપી અને અસરકારક સંયુક્ત કાર્યવાહી માટે બંને સેનાઓની ક્ષમતા વધારવાનો હતો.
હેલિબોર્ન ઓપરેશન અને રેસ્ક્યૂની તાલીમ
સૈન્ય અભ્યાસ દરમિયાન હેલિબોર્ન ઓપરેશનની પણ પ્રેક્ટિસ કરવામાં આવી હતી. ઘાયલ સૈનિકોને તાત્કાલિક સારવાર આપી સુરક્ષિત સ્થળે પહોંચાડવાની પ્રક્રિયા, નિશાનબાજી અને વિવિધ વિશેષ સૈન્ય કૌશલ્યોની પણ તાલીમ આપવામાં આવી હતી. આ અભ્યાસથી બંને દેશોના સૈનિકોને મુશ્કેલ પરિસ્થિતિમાં સાથે મળીને કામગીરી કરવાનો વ્યવહારુ અનુભવ મળ્યો.
ત્રણ તબક્કામાં યોજાયો અભ્યાસ
20થી 23 સપ્ટેમ્બર દરમિયાન ઈન્ટિગ્રેશન ફેઝમાં બંને દેશોના સૈનિકોએ એકબીજાની સૈન્ય પ્રક્રિયા અને તાલીમ પદ્ધતિઓને સમજવાનો પ્રયાસ કર્યો હતો. ત્યારબાદ 24થી 30 સપ્ટેમ્બર દરમિયાન સંયુક્ત તાલીમ અને યુદ્ધાભ્યાસ યોજાયો. અંતિમ તબક્કામાં 1 અને 2 ઓક્ટોબરે બંને દેશોની સૈન્ય ટુકડીઓએ સંયુક્ત અભ્યાસ દ્વારા અત્યાર સુધી મેળવેલી તાલીમને વ્યવહારિક રીતે ચકાસી હતી.
રમતગમત અને સાંસ્કૃતિક કાર્યક્રમોથી મિત્રતા મજબૂત
સૈન્ય તાલીમ ઉપરાંત બંને દેશોના સૈનિકો વચ્ચે રમતગમતની પ્રવૃત્તિઓ પણ યોજાઈ હતી. જેના કારણે સૈનિકો વચ્ચે પરસ્પર સંપર્ક અને મિત્રતા વધુ મજબૂત બની હતી. સમાપન સમારોહ દરમિયાન ભારત અને મંગોલિયાની સમૃદ્ધ સાંસ્કૃતિક તથા સૈન્ય પરંપરાની ઝલક પણ જોવા મળી હતી.
ભારત-મંગોલિયા સંરક્ષણ સહયોગને નવી મજબૂતી
રક્ષા અધિકારીઓના જણાવ્યા અનુસાર ‘નોમેડિક એલિફન્ટ-2026’નું સફળ સમાપન ભારત અને મંગોલિયા વચ્ચેના મજબૂત સંરક્ષણ સહયોગનું વધુ એક ઉદાહરણ છે. આ અભ્યાસથી બંને સેનાઓની સંયુક્ત ઓપરેશનલ ક્ષમતા વધવાની સાથે પરસ્પર વિશ્વાસ, સમજ અને અનુભવના આદાન-પ્રદાનને પણ વધુ મજબૂતી મળી છે.
