Mahadev App Case: મહાદેવ એપના માસ્ટરમાઈન્ડ સૌરભ ચંદ્રાકરને ઓમાનથી ભારત લવાયો
Mahadev App Case
Mahadev App Case: મહાદેવ એપના માસ્ટરમાઈન્ડ સૌરભ ચંદ્રાકરને ઓમાનથી ભારત લવાયો
Mahadev App Case
Mahadev App Case: મહાદેવ એપના ગેરકાયદે ઓનલાઈન સટ્ટાબાજી સિન્ડિકેટના પ્રમોટર અને મુખ્ય આરોપી સૌરભ ચંદ્રાકરને ઓમાનથી ભારત લાવવામાં સીબીઆઈને સફળતા મળી છે. ઈન્ટરપોલના રેડ કોર્નર નોટિસના આધારે રોયલ ઓમાન પોલીસે તેની અટકાયત કરી હતી. ત્યારબાદ ભારત સરકાર, સીબીઆઈ, એન્ફોર્સમેન્ટ ડિરેક્ટોરેટ (ED) અને ઓમાનના અધિકારીઓના સંકલિત પ્રયાસોથી પ્રત્યાર્પણની પ્રક્રિયા પૂર્ણ કરવામાં આવી હતી.
સીબીઆઈની વિશેષ અદાલતમાં રજૂ કરાશે
સીબીઆઈની વિશેષ ટીમ સૌરભ ચંદ્રાકરને ઓમાનથી ભારત લઈને આવી છે. હવે તેને રાયપુર સ્થિત સીબીઆઈની વિશેષ અદાલતમાં રજૂ કરવામાં આવશે. સીબીઆઈના જણાવ્યા અનુસાર, સૌપ્રથમ તેનું તબીબી પરીક્ષણ કરાવવામાં આવશે અને ટ્રાન્ઝિટ રિમાન્ડ મેળવ્યા બાદ તેને રાયપુર લઈ જવામાં આવશે. સૌરભ ચંદ્રાકર સીબીઆઈના બે કેસમાં વોન્ટેડ હતો. આ બંને કેસમાં અગાઉ જ ચાર્જશીટ દાખલ કરવામાં આવી ચૂકી છે. આ ઉપરાંત ED દ્વારા પણ તેની સામે એક કેસમાં પ્રોસિક્યુશન ફરિયાદ દાખલ કરવામાં આવી છે.
ભારત અને વિદેશની અનેક સંપત્તિઓ જપ્ત કરવામાં આવી
છત્તીસગઢ સરકારની વિનંતી બાદ સીબીઆઈએ મહાદેવ ઓનલાઈન બુક કેસની તપાસ શરૂ કરી હતી. તપાસમાં સામે આવ્યું હતું કે આ સિન્ડિકેટ ભારત બહારથી સંચાલિત થતું હતું અને ક્રિકેટ, ફૂટબોલ, પત્તાં સહિતની વિવિધ રમતો પર ગેરકાયદે સટ્ટો રમાડતું હતું. આ માટે દેશભરમાં ફ્રેન્ચાઈઝી આધારિત પેનલ અને બ્રાન્ચનું નેટવર્ક ઊભું કરવામાં આવ્યું હતું. તપાસમાં ગેરકાયદે કમાણી ફર્જી બેંક ખાતાઓ મારફતે ફેરવવામાં આવતી અને ત્યારબાદ હવાલા દ્વારા વિદેશ મોકલવામાં આવતી હોવાનો ખુલાસો થયો હતો. સીબીઆઈના દાવા મુજબ, સિન્ડિકેટ દ્વારા કેટલાક સરકારી અધિકારીઓ અને કર્મચારીઓને પણ કથિત રીતે રકમ ચૂકવવામાં આવતી હતી. ED દ્વારા આ કેસ સાથે જોડાયેલી ભારત અને વિદેશની અનેક સંપત્તિઓ જપ્ત કરવામાં આવી છે. હવે સૌરભ ચંદ્રાકરની પૂછપરછ અને કોર્ટની કાર્યવાહીથી આ સમગ્ર નેટવર્ક અંગે વધુ વિગતો સામે આવવાની શક્યતા છે.
