Madhya Pradesh: ઉજ્જૈનના હોટેલમાં સફાઈ દરમિયાન ગમખ્વાર દુર્ઘટના, ઝેરી ગેસથી 4 કર્મચારીઓનાં મોત
Madhya Pradesh
Madhya Pradesh: ઉજ્જૈનના હોટેલમાં સફાઈ દરમિયાન ગમખ્વાર દુર્ઘટના, ઝેરી ગેસથી 4 કર્મચારીઓનાં મોત
Madhya Pradesh
Madhya Pradesh: મધ્યપ્રદેશના ઉજ્જૈનમાં હોટેલની ટાંકીની સફાઈ દરમિયાન ઝેરી ગેસની ચપેટમાં આવતાં ચાર કર્મચારીઓનાં મોત થયા છે, જ્યારે એક કર્મચારીની હાલત ગંભીર હોવાનું જાણવા મળ્યું છે. આ ઉપરાંત બચાવ કામગીરી દરમિયાન ત્રણ પોલીસકર્મીઓ પણ ઈજાગ્રસ્ત થયા છે. તમામ ઈજાગ્રસ્તોને સારવાર માટે હોસ્પિટલમાં ખસેડવામાં આવ્યા છે. આ દુર્ઘટના શહેરની જૂની હોટેલ શ્રીગંગામાં બની હતી.
ટાંકીની સફાઈ દરમિયાન બની દુર્ઘટના
પ્રાથમિક માહિતી અનુસાર, શનિવારે રાત્રે હોટેલ શ્રીગંગામાં વેસ્ટેજ ટાંકીની સફાઈનું કામ ચાલી રહ્યું હતું. આ દરમિયાન ચેમ્બરમાં ઉતરેલા ચાર કર્મચારીઓ ઝેરી ગેસની ચપેટમાં આવી ગયા હતા. ગેસના કારણે ચારેયનાં મોત થયાં હતાં, જ્યારે અન્ય એક કર્મચારી ગંભીર રીતે ઈજાગ્રસ્ત થયો હતો.
મૃતકોમાં હોટેલના બે કર્મચારીઓ અને બે ખાનગી સફાઈ કર્મચારીઓનો સમાવેશ થાય છે. ઘટનાની જાણ થતાં જ કલેક્ટર, પોલીસ અધિક્ષક (SP) સહિત વહીવટી તંત્રની ટીમ ઘટનાસ્થળે પહોંચી હતી.
અઢી કલાકની જહેમત બાદ મૃતદેહો બહાર કઢાયા
બચાવ કામગીરી દરમિયાન ચેમ્બરમાં પહોંચવામાં ભારે મુશ્કેલીનો સામનો કરવો પડ્યો હતો. ત્યારબાદ વધારાના ચેમ્બરના ટીનશેડને કટરથી કાપવામાં આવ્યો હતો. આશરે અઢી કલાક સુધી ચાલેલી કામગીરી બાદ કર્મચારીઓના મૃતદેહોને બહાર કાઢવામાં આવ્યા હતા.
આ દરમિયાન રેસ્ક્યૂ કામગીરીમાં જોડાયેલા ત્રણ પોલીસકર્મીઓ પણ ઈજાગ્રસ્ત થયા હતા. તેમને તાત્કાલિક હોસ્પિટલમાં સારવાર માટે દાખલ કરવામાં આવ્યા છે.
પરિવારજનોએ હોટેલ સંચાલક સામે કાર્યવાહીની માગ કરી
દુર્ઘટના બાદ મૃતકોના પરિવારજનોમાં ભારે રોષ જોવા મળ્યો હતો. પરિવારજનોએ હોટેલ સંચાલક સામે કડક કાર્યવાહી કરવાની સાથે દરેક પીડિત પરિવારને એક-એક કરોડ રૂપિયાનું વળતર અને પરિવારના એક સભ્યને સરકારી નોકરી આપવાની માગ કરી છે.
સ્થાનિક યુવક આસિફ ખાને જણાવ્યું કે તેમને રાત્રે આશરે 12 વાગ્યે ફોન આવ્યો હતો. ફોન પર તેમના મામા ટાંકીમાં પડી ગયા હોવાની જાણ કરવામાં આવી હતી. ઘટનાસ્થળે પહોંચ્યા ત્યારે તેમના મામાનું મોત થઈ ચૂક્યું હતું. તેમણે જણાવ્યું કે તેમના મામા હોટેલમાં ઓવરટાઇમ કામ કરવા ગયા હતા અને તેમના પરિવારમાં ચાર બાળકો છે. પરિવારને યોગ્ય વળતર આપવાની માગ પણ તેમણે કરી હતી.
અન્ય એક યુવકે આક્ષેપ કર્યો હતો કે કર્મચારીઓને ચેમ્બરની ઊંડાઈ અને જોખમ અંગે યોગ્ય જાણકારી આપવામાં આવી નહોતી. તેમને માત્ર કચરો બહાર કાઢવાનું કહેવામાં આવ્યું હતું. આ દરમિયાન પગ લપસતાં તેમના ભાઈ ચેમ્બરમાં પડી ગયા હતા અને તેમનું મોત થયું હતું. તેમણે પણ પરિવારના એક સભ્યને નોકરી અને એક કરોડ રૂપિયાનું વળતર આપવાની માગ કરી હતી.
મેયરે વ્યક્ત કર્યું દુઃખ, તપાસના આદેશ આપ્યા
ઘટના બાદ શહેરના મેયર મુકેશ ટટવાલ પીડિત પરિવારોને મળવા પહોંચ્યા હતા. તેમણે દુર્ઘટના અંગે ઊંડું દુઃખ વ્યક્ત કરીને પરિવારોને શક્ય તમામ મદદ કરવાની ખાતરી આપી હતી.
મેયરે જણાવ્યું હતું કે હોટેલના વેસ્ટેજ ટાંકીની સફાઈ દરમિયાન બનેલી આ ઘટના અત્યંત દુઃખદ છે. તેમણે વધુમાં કહ્યું કે નગર નિગમને જાણ કર્યા વિના અને સુરક્ષાનાં માપદંડોને અવગણીને આ રીતે સફાઈ કરાવવી ગંભીર બેદરકારીનો વિષય છે.
મેયરે અધિકારીઓને તાત્કાલિક તપાસના આદેશ આપ્યા છે. તેમણે સ્પષ્ટ કર્યું કે સુરક્ષાનાં જરૂરી સાધનો અને વ્યવસ્થા વિના કર્મચારીઓને સફાઈના કામે લગાડનાર હોટેલ સંચાલક અથવા વેપારી સામે કડક દંડાત્મક કાર્યવાહી કરવામાં આવશે. સાથે જ પીડિત પરિવારોના પુનર્વસન અને યોગ્ય સહાય માટે પણ વહીવટી તંત્રને સૂચના આપવામાં આવી છે.
હાલમાં આ મામલે તપાસ અને આગળની કાર્યવાહી અંગે વહીવટી તંત્રની સત્તાવાર વિગતોની રાહ જોવાઈ રહી છે.
