Jharkhand News: ઝારખંડમાં હાથીઓનાં મોતનો સિલસિલો યથાવત્, વધુ એક મૃતદેહ મળ્યો

Jharkhand News: ઝારખંડમાં હાથીઓનાં મોતની ઘટનાઓ સતત સામે આવી રહી છે. તાજો મામલો પશ્ચિમ સિંહભૂમ જિલ્લાના ટંકુરાનો છે, જ્યાં બુધવારે સવારે એક ખેતરમાંથી હાથીનો મૃતદેહ મળી આવ્યો હતો. છેલ્લા બે મહિનામાં રાજ્યના અલગ-અલગ વન વિસ્તારોમાં હાથીઓનાં મોતની ચાર ઘટનાઓ નોંધાઈ હોવાનું અહેવાલમાં જણાવાયું છે. તાજેતરની ઘટનામાં હાથીનું મોત કયા કારણોસર થયું તે હજુ સ્પષ્ટ થયું નથી. ગ્રામજનોએ વીજ કરંટ લાગવાની આશંકા વ્યક્ત કરી છે.

રાત્રે ગામની સીમામાં પહોંચ્યું હતું 20 હાથીઓનું ટોળું

પશ્ચિમ સિંહભૂમ જિલ્લાના બડાજામદા ઓપી વિસ્તારના ટંકુરા બસ્તીમાં બુરમા ટોલી નજીક બુધવારે સવારે ગ્રામજનોએ ખેતરમાં હાથીનો મૃતદેહ જોયો હતો. આ પહેલાં મંગળવારે સાંજે આશરે 20 હાથીઓનું ટોળું ગામની સીમામાં આવી પહોંચ્યું હતું.

ગ્રામજનોના જણાવ્યા અનુસાર, તેમણે વન વિભાગને જાણ કરીને મદદ માગી હતી. જોકે, કોઈ ટીમ ઘટનાસ્થળે પહોંચી ન હોવાનું તેમણે જણાવ્યું હતું. ત્યારબાદ ગ્રામજનોએ જાતે જ જવાબદારી સંભાળી હતી. તેઓ આખી રાત જાગીને હાથીઓના ટોળાને ગામથી દૂર હાંકી કાઢવાનો પ્રયાસ કરતા રહ્યા હતા. સવારે ખેતરમાં એક હાથી મૃત હાલતમાં મળી આવ્યો હતો.

હાથીના મોતનું ચોક્કસ કારણ જાણવા મળ્યું નથી. ગ્રામજનોએ વીજ કરંટ લાગવાની આશંકા વ્યક્ત કરી છે. પોસ્ટમોર્ટમ રિપોર્ટ આવ્યા બાદ જ મોતનું વાસ્તવિક કારણ સ્પષ્ટ થશે. ગ્રામજનોએ વન વિભાગની કામગીરી સામે સવાલ ઉઠાવી નિષ્પક્ષ તપાસની માગ કરી છે.

28 ઓક્ટોબરે લાતેહારમાં પણ મળ્યો હતો હાથીનો મૃતદેહ

આ પહેલાં 28 ઓક્ટોબરે લાતેહાર જિલ્લાના બાલુમાથ પોલીસ સ્ટેશન વિસ્તારના બિશુનપુર જંગલમાં પણ એક હાથી મૃત હાલતમાં મળી આવ્યો હતો. મૃતદેહ મળ્યાની જાણ થતાં વન વિભાગની ટીમ ઘટનાસ્થળે પહોંચી હતી. બીજા દિવસે રેન્જર નંદકુમાર મહતોના નેતૃત્વમાં અધિકારીઓ અને પશુચિકિત્સકોની ટીમે તપાસ હાથ ધરી હતી. રેન્જરે હાથીઓ વચ્ચેના આંતરિક સંઘર્ષને મોતનું સંભવિત કારણ ગણાવ્યું હતું.

માદા હાથીના બંને દાંત ગાયબ મળ્યા હતા

ઓક્ટોબરની શરૂઆતમાં પશ્ચિમ સિંહભૂમના જગન્નાથપુર વિસ્તારમાં આવેલા ભાંગાંવમાં પણ એક માદા હાથી મૃત મળી આવી હતી. ગ્રામજનોએ તેના બંને દાંત ગાયબ હોવાનું જોયું હતું. આથી હાથીદાંતની તસ્કરી માટે તેનો શિકાર કરવામાં આવ્યો હોવાની આશંકા વ્યક્ત કરવામાં આવી હતી. વન વિભાગે ઘટનાસ્થળે પહોંચીને તપાસ શરૂ કરી હતી. આ વિસ્તારમાં છેલ્લા એક વર્ષ દરમિયાન સાત હાથીઓનાં મોત થયાના અહેવાલો સામે આવ્યા હોવાનું પણ જણાવાયું છે.

7 સપ્ટેમ્બરે વીજ કરંટ લાગતાં હાથીનું મોત

આ પહેલાં 7 સપ્ટેમ્બરે લાતેહાર જિલ્લાના બાલુમાથ પોલીસ સ્ટેશન વિસ્તારના કોમર ગામમાં વીજ તારની અડફેટે આવતાં એક હાથીનું મોત થયું હતું. આશરે 15 હાથીઓનું ટોળું ગામ નજીકનાં ખેતરો તરફ પહોંચ્યું હતું. આ દરમિયાન એક હાથી પાક અને ઘરની સુરક્ષા માટે લગાવવામાં આવેલા વીજ તારની અડફેટે આવી ગયો હતો, જેના કારણે તેનું ઘટનાસ્થળે જ મોત થયું હતું.

ઝારખંડમાં જંગલોની નજીક આવેલા ગામોમાં હાથીઓની અવરજવર વધી રહી છે. પાક અને ઘરની સુરક્ષા માટે ગ્રામજનો દ્વારા જોખમી ઉપાયો અપનાવવામાં આવતા હોવાના અહેવાલો પણ સામે આવ્યા છે. ટંકુરામાં મળેલા હાથીના મૃતદેહના કિસ્સામાં હવે પોસ્ટમોર્ટમ રિપોર્ટ અને વન વિભાગની તપાસ બાદ જ મોતનું ચોક્કસ કારણ જાણી શકાશે.

આ પણ વાંચો : Srinagar Fire Incident: શ્રીનગરના બેમિનામાં ભીષણ આગ, 80 ઝૂંપડાં ખાખ, 2 લોકોનાં મોત