Yudh Abhyas 2026: ભારત-અમેરિકાના જવાનોએ કર્યો સંયુક્ત અભ્યાસ, ઔલીમાં આતંકવાદ વિરોધી ઓપરેશનની કરી ડ્રિલ

Yudh Abhyas 2026: ભારત અને અમેરિકાની સેનાઓ વચ્ચે સંયુક્ત સૈન્ય અભ્યાસ 'યુદ્ધ અભ્યાસ-2026' ચાલી રહ્યો છે. ઉત્તરાખંડના ઔલીમાં બંને દેશોના સૈનિકોએ આતંકવાદ વિરોધી ઓપરેશનની ખાસ ડ્રિલ કરી હતી. આ દરમિયાન સૈનિકોએ ઈમારતમાં પ્રવેશ, આતંકવાદીઓને શોધવા, રૂમ ક્લિયર કરવા અને નજીકથી લડાઈ જેવી પરિસ્થિતિઓનો અભ્યાસ કર્યો હતો.

ભારત-અમેરિકા સંયુક્ત સૈન્ય અભ્યાસની 22મી આવૃત્તિનું ઉદ્ઘાટન 15 સપ્ટેમ્બરે ઉત્તરાખંડના ઔલીમાં કરવામાં આવ્યું હતું. આ અભ્યાસ રાજસ્થાનના મહાજન ફીલ્ડ ફાયરિંગ રેન્જમાં પણ એકસાથે યોજાઈ રહ્યો છે. બંને દેશોના આશરે 600-600 સૈનિકો, એટલે કે કુલ 1,200 જવાનો આ અભ્યાસમાં ભાગ લઈ રહ્યા છે.

પહાડી વિસ્તારોમાં ઓપરેશનની તૈયારી

‘યુદ્ધ અભ્યાસ-2026’નો મુખ્ય ઉદ્દેશ્ય પહાડી અને અર્ધ-પહાડી વિસ્તારોમાં સંયુક્ત સૈન્ય ઓપરેશનની ક્ષમતા વધારવાનો છે. અભ્યાસ દરમિયાન ઇન્ટિગ્રેટેડ બેટલ ગ્રુપ (IBG) અને પાયદળની આગેવાની હેઠળના ઓપરેશન પર વિશેષ ભાર મૂકવામાં આવી રહ્યો છે.

ઔલીમાં આતંકવાદ વિરોધી ડ્રિલ દરમિયાન સૈનિકોએ ડ્રોન, રોબોટિક ડોગ્સ, શોધખોળ માટેના શ્વાન અને સ્નાઇપર્સની મદદથી ઓપરેશન હાથ ધરવાની તાલીમ લીધી હતી. આધુનિક ટેક્નોલોજી અને પરંપરાગત સૈન્ય કૌશલ્ય વચ્ચે સંકલન વધારવા પર પણ ધ્યાન આપવામાં આવ્યું.

ડ્રોન અને ઓટોનોમસ સિસ્ટમ પર ભાર

અભ્યાસમાં ડ્રોન અને ઓટોનોમસ સિસ્ટમના ઉપયોગને પણ મહત્વ આપવામાં આવી રહ્યું છે. સૈનિકો દેખરેખ, માહિતી એકત્ર કરવા અને દુશ્મનની સ્થિતિ અંગે જાણકારી મેળવવા માટે આધુનિક ટેક્નોલોજીનો ઉપયોગ શીખી રહ્યા છે. બીજી તરફ, રાજસ્થાનના મહાજન ફીલ્ડ ફાયરિંગ રેન્જમાં આધુનિક હથિયાર પ્રણાલીઓનું પ્રદર્શન અને તાલીમ યોજાઈ રહી છે.

બંને દેશોના સૈન્ય નિષ્ણાતો મલ્ટી-ડોમેન વોરફેર અને નવી ઉભરી રહેલી સૈન્ય ટેક્નોલોજી અંગે પોતાના અનુભવો પણ શેર કરી રહ્યા છે. આ સંયુક્ત અભ્યાસથી બંને દેશોની સેનાઓ વચ્ચે તાલમેલ, સંયુક્ત આયોજન અને વિવિધ ભૌગોલિક પરિસ્થિતિમાં સાથે મળીને ઓપરેશન કરવાની ક્ષમતાને વધુ મજબૂત બનાવવાનો પ્રયાસ થઈ રહ્યો છે.

આ પણ વાંચો: PM Modi Birthday: વડાપ્રધાનના જન્મદિવસ પર મિત્ર પુતિનનો ખાસ મેસેજ, કહ્યું- 'તમારો દરજ્જો...'