Canada : ફ્લાઈટ ટ્રેનિંગ દરમિયાન મોટી વિમાન દુર્ઘટના, 2 ભારતીય વિદ્યાર્થીઓના મોત
Canada
Canada : ફ્લાઈટ ટ્રેનિંગ દરમિયાન મોટી વિમાન દુર્ઘટના, 2 ભારતીય વિદ્યાર્થીઓના મોત
Canada
Canada : કેનેડામાં ફ્લાઈટ ટ્રેનિંગ દરમિયાન થયેલી એક વિમાન દુર્ઘટનામાં બે ભારતીય વિદ્યાર્થીઓના મોત થયા છે. મૃતકોની ઓળખ તમિલનાડુના મનોજ શિવકુમાર અને પુડુચેરીના શ્રીસરન થિરુગ્નાનસંબંથમ તરીકે થઈ છે. આ અકસ્માત બાદ ભારતમાં તેમના પરિવારજનોમાં શોકની લાગણી ફેલાઈ છે.
ભારતીય દૂતાવાસે આપી જાણકારી
વેનકુવર સ્થિત ભારતીય વાણિજ્ય દૂતાવાસે સોશિયલ મીડિયા પ્લેટફોર્મ એક્સ પર પોસ્ટ કરીને બંને વિદ્યાર્થીઓના નિધન પર દુઃખ વ્યક્ત કર્યું છે. દૂતાવાસે જણાવ્યું કે બંને ભારતીય વિદ્યાર્થીઓ ફ્લાઈટ ટ્રેનિંગ દરમિયાન થયેલા દુઃખદ વિમાન અકસ્માતમાં જીવ ગુમાવી બેઠા છે. દૂતાવાસે મૃતકોના પાર્થિવ દેહને ભારત પરત લાવવા માટે તેમના પરિવારજનોને શક્ય તમામ મદદ અને કાઉન્સ્યુલર સહાય પૂરી પાડવાની ખાતરી આપી છે.
અચાનક વિમાન સાથે સંપર્ક તૂટી ગયો
મળતી માહિતી મુજબ, દુર્ઘટનાગ્રસ્ત વિમાન મેનિટોબા સ્થિત ફ્લાઈટ સ્કૂલ 'હાર્ઝ એર'નું સેસના 172 વિમાન હતું. આ વિમાન રેજિનાથી સ્ટીનબેક, મેનિટોબા તરફ રાત્રિના ક્રોસ-કન્ટ્રી ફ્લાઈટ પર હતું. ફ્લાઈટ દરમિયાન વિમાન સાસ્કેચેવાનના કાર્લાઈલ વિસ્તારમાંથી પસાર થઈ રહ્યું હતું. ત્યારબાદ કિસબે નજીક વિમાન સાથે સંપર્ક તૂટી ગયો હતો.
વિમાન નિર્ધારિત સમય સુધી પોતાના ગંતવ્યે ન પહોંચતા તેની શોધખોળ શરૂ કરવામાં આવી હતી. ત્યારબાદ સર્ચ એન્ડ રેસ્ક્યૂ ટીમે વિમાનને શોધી કાઢ્યું હતું. ઘટનાસ્થળે વિમાનમાં સવાર બંને લોકો મૃત હાલતમાં મળી આવ્યા હતા. અહેવાલો અનુસાર, વિમાનની શોધ માટે હર્ક્યુલિસ સર્ચ એરક્રાફ્ટનો ઉપયોગ કરવામાં આવ્યો હતો. શોધ ટીમના ટેક્નિશિયનોએ અંધારામાં પેરાશૂટ દ્વારા ઘટનાસ્થળે પહોંચીને તપાસ કરી હતી અને બંને પાઈલટ્સના મોત થયાની પુષ્ટિ કરી હતી.
ફ્લાઈટ દરમિયાન શું ખામી સર્જાઈ?
કેનેડાના અધિકારીઓ દ્વારા સમગ્ર દુર્ઘટનાની તપાસ શરૂ કરવામાં આવી છે. કેનેડાના ટ્રાન્સપોર્ટેશન સેફ્ટી બોર્ડ (TSB)એ પણ તપાસ માટે પોતાની ટીમ ઘટનાસ્થળે મોકલી છે. અકસ્માતનું ચોક્કસ કારણ શું હતું અને ફ્લાઈટ દરમિયાન શું ખામી સર્જાઈ હતી તે જાણવા માટે તપાસ કરવામાં આવી રહી છે. ભારતીય વાણિજ્ય દૂતાવાસે મૃતકોના પરિવારજનો સાથે સંપર્ક જાળવી રાખ્યો છે અને બંનેના પાર્થિવ શરીરને ભારત પરત લાવવાની પ્રક્રિયામાં શક્ય તમામ સહાય પૂરી પાડવાની ખાતરી આપી છે. આ દુર્ઘટનાથી બંને વિદ્યાર્થીઓના પરિવાર અને પરિચિતોમાં શોકની લાગણી ફેલાઈ છે.
